ABŞ Dövlət Departamenti Gürcüstanın 20 vətəndaşına, o cümlədən nazirlərə, parlament üzvlərinə, hüquq-mühafizə və təhlükəsizlik xidmətlərinin nümayəndələrinə viza məhdudiyyətləri tətbiq edib.
Qerbxeber.com Aktual.ge istinadən xəbər verir ki, bu barədə Dövlət Departamentinin bəyanatında bildirilib.
“Dövlət Departamenti Gürcüstanda demokratiyanın zəiflədilməsində məsuliyyət daşıyan və ya iştirakçı olan şəxslərə viza verilməsini qadağan edən viza məhdudiyyəti siyasəti çərçivəsində əlavə tədbirlər görməkdədir. Bu gün qəbul edilən qərar hökumət nazirləri, parlament üzvləri, hüquq-mühafizə və təhlükəsizlik qurumlarının rəsmiləri, həmçinin xüsusi vətəndaşlar daxil olmaqla təxminən 20 nəfərə şamil edilir” , – deyə bəyanatda qeyd olunub.
Dövlət Departamentinin bəyanatına əsasən, ABŞ “Gürcü Arzusu” partiyasının Gürcüstan vətəndaşlarına, o cümlədən etirazçılara, media nümayəndələrinə, hüquq müdafiəçilərinə və müxalifət fəallarına qarşı davam edən, sərt və əsassız zorakılığını qətiyyətlə pisləyir.
” ‘Gürcü Arzusu’ Gürcüstan xalqının böyük əksəriyyətinin arzuladığı və ölkənin konstitusiyasında nəzərdə tutulan Avro-Atlantik gələcək yolundan uzaqlaşıb. Biz əminik ki, demokratiyanın zəiflədilməsinə görə məsuliyyət daşıyan yüksək vəzifəli şəxslər viza məhdudiyyətlərinə məruz qalacaqlar. Demokratiyanın zəiflədilməsində iştirak edən şəxslərin məsuliyyətə cəlb olunması üçün əlavə tədbirlər, o cümlədən sanksiyalar hazırlayırıq. Biz Gürcüstan xalqının yanında dayanırıq və güclü, firavan, Avro-Atlantik cəmiyyətə möhkəm inteqrasiya olunmuş demokratik Gürcüstan görmək istəyirik. Bu gün qəbul edilən tədbirlər ABŞ-ın qərarlılığını nümayiş etdirir və daha əvvəl ‘Gürcü Arzusu’ ilə əlaqəli 100-dən çox şəxs və onların ailə üzvlərinə qarşı görülən tədbirlərə əlavə olunur” , – bəyanatda deyilir.
