Biz elə tədbirlər görəcəyik ki, həmin hökumət bunun bədəlini ödəsin

Qerbxeber.com  xəbər verir ki, Marko Rubio Nümayəndələr Palatasının Xarici Əlaqələr Komitəsinin iclasında çıxış edərkən ona sual verən Respublikaçı konqresmen Co Uilson idi. Qanunvericinin  sualı belə olub:

“Sizdə olan liderlik və uzaqgörənliyə görə təşəkkür edirəm ki, nə edilməsi lazım olduğunu bu qədər tez gördünüz. Həmçinin Gürcüstan Respublikasında anti-Amerika mövqeli ‘Gürcü Arzusu’ ilə bağlı Tramp administrasiyasının qəti mövqeyinə görə də minnətdaram. Onlar 26 oktyabrda Gürcüstanda seçkiləri saxtalaşdırdılar. ABŞ-la əlaqəni cinayət kimi təqdim etdilər. Amerika şirkətlərini qovdular, ticarəti və Orta Dəhlizdə minerallara çıxışı blokladılar və Gürcüstanı Çin Kommunist Partiyasına təslim etdilər. Dəfələrlə prezident Trampa və Amerika liderlərinə qarşı təhqiramiz bəyanatlar yayımladılar. Bütün bunların fonunda xüsusilə minnətdaram ki, ‘Rondel Fondu’ tərəfindən bu yaxınlarda dərc olunmuş hesabat Çin Kommunist Partiyasının artıq Gürcüstan Respublikasında təsiri olduğunu təsdiqləyir. İstəyirəm ki, bu sənəd rəsmi material kimi qəbul edilsin.

Bundan əlavə, 200 gündən artıqdır ki, azadlıqsevər gürcülər küçələrə çıxaraq, Amerika bayraqlarına bürünüb və prezidentin [Tramp] şəkilləri ilə qəhrəmancasına mübarizə aparırlar. Sizin rəhbərliyinizlə Dövlət Departamentinin anti-Amerika ‘Gürcü Arzusu’na real bədəl ödətməsi üçün nə ediləcək?”.

Bu suala ABŞ-ın baş diplomatı belə cavab verib:

“Giriş nitqimdə qeyd etdiyim kimi, ABŞ-ın məqsədi bizim milli maraqlarımıza əsaslanır. Biz bu məsələyə belə baxırıq: ‘Dünyanın mühüm bir hissəsində anti-Amerika yönümlü bir hökumətin hakimiyyətdə olması bizim milli maraqlarımıza uyğundurmu?’ Əgər cavab yoxdursa, biz elə tədbirlər görəcəyik ki, həmin hökumət bunun bədəlini ödəsin.

Hazırda məsələ müzakirə mərhələsindədir, biz variantları və əlavə variantları nəzərdən keçiririk. Bu gün sizə konkret hansı addımı atacağımızı deyə bilmərəm, lakin onu deyə bilərəm ki, məsələ aktiv şəkildə müzakirə olunur.

Və bir daha vurğulayıram, bu, bizim regional bürolarımıza və yerli ofislərimizə niyə ehtiyacımız olduğunu göstərən parlaq nümunədir – anti-Amerika hökumətlər üçün ən təsirli tədbirlərin nələr ola biləcəyinə dair rəhbərlik almaq üçün”.