Xalqımızın müqəddəs bayramı olan Novruz gəlişi ilə ürəklərə hərarət, könüllərə təravət gətirir. Qışı geridə qoyan baharda təbiətin oyanışı insanları yaşamağa ruhlandırır. Bu gün ölkəmizin bütün bölgələrində bayram əhval-ruhiyyəsi hökm sürür. Qazaxlılar isə Novruzu tam fərqli,özünəməxsus şəkildə qeyd etməsi ilə seçilir. Tədbir səhər saatlarından başlayaraq ictimaiyyət nümayəndələrinin, yerli sənətkarların, aşıqların, idmançıların rayonun girəcəyindən yürüşü ilə start götürüb. Qazaxın hər yerində Novruz atributlarına-ənənəvi Keçəl ilə Kosanın oyunları, alovlandırılan bayram tonqalı, boyanmış yumurtalar, təbiətin oyanışını simvolizə edən səməniyə rast gəlinir ki, bu da əsrlərdən bizə gəlib çatan bayram adət-ənənələrinin günümüzdə yaşadılmasından xəbər verir.
Qazax Rayon Mədəniyyət Evinin qarşısına çatan yürüşçülər şənliyi burada davam etdiriblər. Qazax Dövlət Dram Teatrının əməkdaşları Yusif Qoca və Zəmanə Dərviş tədbiri giriş sözü ilə açıq elan ediblər. Təmtəraqlı tədbirə Böyük Vətən Müharibəsində xüsusi şücaət göstərmiş qazilər və qürur yerimiz olan şəhid yaxınları da qatılıblar. Qazaxlılar həmçinin ilk dəfə olaraq bayram şənliyində sürpriz nikaha şahidlik ediblər. Belə ki, qazi Elməddin Yusibov və onun sevib-seçdiyi xanım Bənövşə Əhmədova ictimaiyyət qarşısında nikahlarını rəsmiləşdiriblər. Hər kəs bu addımı xüsusi coşğu ilə qarşılayıb onlara bir ömür boyu firavan həyat arzu ediblər. Qazaxlıların Novruz Şənliyi musiqili qonaqların iştirakı ilə davam etdirilib.
Aymirə İsmayılqızı, Röyal İslam, QərbXəbər
