Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi “QHT-dövlət əməkdaşlığında yeni çağırışlar: ictimai nəzarət mexanizmlərinin gücləndirilməsi” adlı respublika zona konfransları təşkil edir.
“Qərb Xəbər” Şəmkir Regional Qeyri-Hökumət Təşkilatlarının Resurs və Təlim Mərkəzi İctimai Birliyinin sədri Fuad Bədəlovun Şəmkirdə keçirilən konfrans barədə təəssüratlarını təqdim edir:
Konfrans ictimai şuralarla icra hakimiyyətləri arasında əməkdaşlığın gücləndirilməsində müəyyən qədər rol oynayacaq. Regionlarda konfransların keçirilməsi onu gösərir ki, ictimai şuraların fəaliyyətinin gücləndirilməsində hökumət maraqlıdır. İctimai Şuralar bu imkandan yararlanaraq ictimai iştirakçılığın şəffaflığının qorunması sahəsində və monitorinqlərin aparılması, nəticələrin təhlili və bu sahədə səmərəliliyin artırılmasına dair tövsiyyələrlə çıxış edə bilərlər.
İctimai nəzarət dövlət siyasətinin həyata keçirilməsi, hüquqi demokratik dövlət və vətəndaş cəmiyyəti quruculuğu, dövlət idarəetməsi ilə birbaşa bağlıdır. Bu cür tədbirlərin təşkili, ümid edirəm, müsbət nəticələrin əldə olunmasına təkan verəcək.
Hesab edirəm ki, konfransdan sonra regionda açıq hökumətin və ictimai nəzarətin fəaliyyətinin gücləndirilməsi, eyni zamanda müxtəlif üsul və vasitələrdən istifadə etməklə, rayonlarda vətəndaşların dövlət orqanlarının fəaliyyətində iştirakçılığının gücləndirilməsinə dəstək oluna bilər. Habelə, qərarların qəbulu prosesində vətəndaş iştirakçılığına geniş imkan yarana bilər.
İctimai Şuraların təkliflər vermək, yerli icra strukturlarının fəaliyyətinə ictimai nəzarəti həyata keçirmək, yerli icra hakimiyyəti və yerli özünüidarəetmə orqanları ilə ictimaiyyət arasında səmərəli qarşılıqlı fəaliyyəti təşkil etmək, yerli icra strukturlarının fəaliyyətində aşkarlığın və şəffaflığın təmin olunmasına səy göstərmək, qərarların qəbulu zamanı ictimai rəy və vətəndaşların qanuni maraqlarının nəzərə alınması priorotet sahələrindən biridir.
Beləliklə, açıq hökumətin təşviqi və ictimi nəzarət sahəsində ictimai şuralar müəyyən təcrübələr əldə edə biləcəklər.
Amma bununla bərabər regionda açıq hökumətin və ictimai nəzarətin təşviqi üçün korrupsiyaya qarşı mübarizənin gücləndirilməsi baxımından institusional dəstək mütləq vacibdir. Belə ki, “İctimai İştirakçılıq Haqqında” Azərbaycan Respublikasının Qanununda tələb olunan işləri icra etmək üçün İctimai Şuralara müəyyən qədər texniki və institusional dəstək vacibdir.
Şura Qanunda göstərildiyi kimi, daimi yerlərdə ictimai müzakirələr və dinləmələr təşkil etməli, ictimai rəyi öyrənməli, qəbul olunan qərarların ictimai müzakirəsini təşkil etməlidir. Xüsusən cəmiyyətdə açıq hökumətin və ictimai nəzarətin təşviqi istiqamətində araşdırmalar aparmağı zəruri hesab edirəm. Bu istiqamətdə konfrans yuxarıda göstərilənlərə bir istiqamət vermiş olacaq.
