Təhsil eksperti: “Elm adamlarının əmək haqqlarında artım olacaq”

Elm və Təhsil Nazirliyinin tabeliyinə verilən elmi müəssisə və təşkilatların siyahısı təsdiqlənib.

“Qərb Xəbər” xəbər verir ki, bununla bağlı Azərbaycan Respublikasının Prezidenti İlham Əliyev fərman imzalayıb.

Fərmana əsasən, Azərbaycan Milli Elmlər Akademiyasının (AMEA) büdcədən maliyyələşdirilən elmi müəssisələri Elm və Təhsil Nazirliyinin tabeliyinə verilib.

Məsələ ilə bağlı “Qərb Xəbər”ə danışan təhsil üzrə ekspert Elçin Əfəndi bildirdi ki, bundan sonra elm və təhsilin inkişaf edəcəyini düşünürəm:

“Dünənki fərmana əsasən Elm və Təhsil Nazirliyi yaradıldı. AMEA-nın tərkibində olan müəyyən institutlar həmin nazirliyin tərkibinə keçirildi. Təəssüf ki, Elm sahəsində ciddi nailiyyətlərə nail ola bilməmişdik. Bundan sonra elm və təhsilin inkişafı gözlənilir. İndiyə qədər elmdə aparılan ümumi təcrübələr təhsilə tətbiq olunurdu. Biz bunun effektini müşahidə edə bilmirdik. Amma, indi ikisinin mütəşəkkil bir yerdə olması Azərbaycan elminə, təhsilinə müsbət qatqılar qatacağını düşünürəm”.

Təhsil eksperti əlavə edib ki, elm adamlarının, alim və professorların əmək haqqlarının artacağı gözlənilir:

“Həmişə dövlət büdcəsindən pul ayrılanda elm üzrə daha az pul ayrılırdi. Təhsilə isə daha çox məbləğ ayrılırdı. Bundan sonra attestasiya imtahanı aparılacağı gözlənilir. Bu imtahandan sonra davam edəcək elm adamlarının əmək haqqlarında artım olacaq”.

RAhib İsgəndərli

Qərb Xəbər