Sərhəddə partlayış səsləri-Qazaxın işğal altında olan 3 kəndinin təhvil verilməsinə hazırlıq gedir

Son iki gündür Qazax rayonunda partlayış səsləri eşidilir. Bu hal əhali arasında müəyyən təşviş yaratmaqdadır.Əldə etdiyimiz məlumata əsasən, Azərbaycan və Ermənistan arasında əldə edilmiş razılaşmaya əsasən sərhədin demarkasiya və delimitasiya prosesinin davam etdirilməsi üçün hazırlıq başlayıb. 

Qerbxeber.com bildirir ki, Tavuş vilayətinin Açarkut kənd icmasının keçmiş üzvü Karen Qazaryan bəzi ərazilərin minalardan təmizləndiyini və çıxarılan qurğuların partladılacağını bildirib.

Qazaryan Tavuşda üç kəndin Azərbaycana təhvili üçün hazırlıq görüldüyünü deyib:

“Yeni güzəştlər üçün demək olar ki, hər şey hazırdır. Bu gün səhər saatlarından etibarən İcevan icmasının tərkibinə daxil olan Azatamut-Kayanavan-Aygehovit kəndləri ərazisində basdırılan minalar çıxarılıb, artıq onların partladılması üzrə işlər görülür. SSRİ dövründə azərbaycanlıların məskunlaşdığı Yuxarı Voskepar (Yuxarı Əskipara-red.) adlanan ərazi təhvil veriləcək. Bununla da Lori bölgəsi sərhədə çevriləcək, Açarkut kəndi isə üçtərəfli şəkildə Azərbaycan əraziləri ilə əhatə olunacaq. Prosesin davamında Sofulu və Bərxudarlı adlanan kəndlər də təslim ediləcək. Nəticədə Gürcüstan-Ermənistan dövlətlərarası avtomobil yolunun 70%-lik hissəsi Azərbaycanın nəzarətinə keçmiş olacaq”.