Ukrayna Silahlı Qüvvələri Rusiyanın Çuvaşıya Respublikasının Çeboksar şəhərində yerləşən strateji hərbi-sənaye obyektinə zərbə endirib.
Qerbxeber.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.
Zərbə Ukraynanın pilotsuz uçuş aparatları bölmələrinin digər Müdafiə Qüvvələri strukturları ilə birgə keçirdiyi planlı əməliyyat çərçivəsində həyata keçirilib.
Hücumun hədəfi Rusiyanın “VNIIR-Progress” ASC və “ABS Elektro” MMC müəssisələri olub. Bu obyektlər “Shahed” tipli hücum dronlarında istifadə olunan “Kometa” adaptiv antenlərini, həmçinin idarə olunan aviasiya bombaları üçün planlaşdırma və korrektə modullarını və digər yüksək dəqiqlikli silah komponentlərini istehsal edir.
Əldə olunan ilkin məlumatlara görə, hərbi obyektə ən azı iki kamikadze dronla zərbə endirilib. Nəticədə müəssisədə genişmiqyaslı yanğın başlayıb. Zərbənin dəqiq nəticələri və vurulmuş ziyan hələlik məlum deyil.
