Ermənistanın Gürcüstanla dövlətlərarası yolunun Tavuş vilayətinin Azərbaycanın Qazax rayonu ilə sərhəddə yerləşən Kirants kəndindən keçən hissəsi bu gündən işləməyəcək.
Bu barədə Ermənistan KİV məlumat yayıb.
Məlumata görə, Ermənistanın yol polisləri bir-bir bütün avtomobillərə Açarkut kəndindən yeni yolun tikildiyini və oradan istifadə etməli olduqlarını bildirir. Kirantsdan keçən yol isə artıq bağlanıb.
Kənddə Azərbaycanla sərhəd divarı çəkilən ərzidə qazıntı işlərinin aparıldığı deyilir. Ehtimal olunur ki, həmin ərazidə sərhədboyu tikanlı məftillər çəkiləcək.
Xatırladaq ki, artıq bir neçə gündür dövlətlərarası yolun Azərbaycanın nəzarətinə keçəcəyinə dair məlumatlar yayılırdı. Ermənistan sərhəd xidmətinin bu istiqamətdə yekun işlər gördüyü bildirilirdi. Tavuş bölgəsindən başlayan demarkasiya prosesi nəticəsində Kirants kəndinin bir hissəsi Azərbaycanın nəzarətinə keçib. Sərhəd xətti kəndi iki hissəyə ayırıb.
