Bild: Baltik dənizində Rusiya və NATO ölkələri eyni vaxtda hərbi təlimlər keçirəcək

NATO ölkələri iyunun 3-də Baltik dənizində Baltops-2025 hərbi təlimləri keçirmək niyyətindədir.

Qerbxeber.com-un “Bild” qəzetinə istinadən verdiyi məlumata görə, mayın 27-də – “adi vaxtdan bir ay tez” – Rusiyanın 20 hərbi gəmisi də təlimlər keçirmək üçün Baltikyanı ölkələrə doğru yola düşüb.

Nəşr bunun tərəflər arasında münasibətlərdə əlavə gərginlik yarada biləcəyini irəli sürüb.

Nəşr Bonn Universitetinin (CASSIS) analitik mərkəzinin baş elmi işçisi Moritz Brakedən sitat gətirir: “Baltik dənizində baş verənlər daha ciddi eskalasiyaya çevrilmək təhlükəsi daşıyır”.

Eyni zamanda, Kil Universitetinin Dəniz Strategiyası və Təhlükəsizliyi Departamentinin rəhbəri Yohannes Petersin sözlərinə görə, Rusiyanın hərəkətləri tamamilə qanunidir. Onun sözlərinə görə, Rusiyanın manevrləri qarşı tərəfin kəşfiyyatı və müşahidəsinə yönəlib.

Baltik Donanmasının mətbuat xidmətinin məlumatına görə, Şimal Donanmasının qüvvələri Rusiya Aerokosmik Qüvvələri, Moskva və Leninqrad Hərbi Dairələrinin dəstəyi ilə keçirilən təlimlərdə iştirak edir.