Təbrizin“Traktor” komandası İran çempionu olub

Təbrizin “Traktor” komandası İran Pro-liqasında vaxtından əvvəl çempion olub.

Qerbxeber.com xəbər verir ki, “qızıl qurdlar” 28-ci turun matçında Qəzvinin “Şəms Azər” komandasını 4:0 hesabı ilə inamlı şəkildə məğlub ediblər.

Oyun cümə axşamı Qəzvindəki “Sərdar Azadegan” stadionunda keçirilib. Oyun ilk dəqiqələrdən qonaqların tam nəzarəti altında olub. Artıq birinci dəqiqədə xorvatiyalı hücumçu Domaqoy Drojdek hesabı açıb. 8-ci dəqiqədə Əmirhüseyn Hüseynzadə üstünlüyü ikiqat artırıb, 30-cu dəqiqədə isə Drojdek dubl edərək fasiləyə qədər hesabı 3:0-a çatdırıb.

İkinci hissədə “Şəms Azər”in müdafiəçisi Homən Rəbiizadənin qovulmasından sonra “Traktor” penalti hüququ qazanıb. 11 metrlik cərimə zərbəsini yerinə yetirən Rikardo Alveş topu tora göndərərk oyunda yekun hesabı müəyyənləşdirib: “Şəms Azər” – 0, “Traktor” – 4:0.

Qələbə “Traktor”a mövsümün bitməsinə iki tur qalmış çempionluğu təmin edib.

Tribunalarda yerli iqtidar nümayəndələri və digər rəsmi şəxslər Təbriz komandasının tarixi qələbəsini izləyiblər.