Tovuz rayonu Aşağı Quşçu kənd məktəbində kütləvi zəhərlənmənin fəsadları davam edir

Xəbər verdiyimiz kimi, bir neçə gün əvvəl Tovuz rayon Aşağı Quşçu kənd 1 saylı tam orta məktəbində pelet sobasının tıxanması nəticəsində iki sinifdə kütləvi dəm qazından zəhərlənmə hadisəsi baş verib. Qazax -Tovuz Regional Təhsil İdarəsinin məlumatına görə, zərərçəkən 71 nəfər şagirdə Tovuz rayon Mərkəzi xəstəxanasında ilk yardım göstərilərək evə təxliyyə etmişdilər.

Lakin əldə etdiyimiz məlumata görə zəhərlənmə hadisəsinin fəsadları hələ ki, şagirdlərdən əl çəkmir.Qerbxeber.com -a Aşağı Quşçu kənd sakinlərinin verdiyi məlumata görə, hadisədən bir gün əvvəl də məktəbdə sobanın tüstülənməsi hadisəsi baş verib, lakin tez aradan qaldırılıb.

Sakinlərin bildirdiyinə görə-“Kütləvi zəhərlənmənin olduğu gün isə, soba tüstüləyəndən sonra şagirdlər sinifdən bayıra çıxarılıb. Daha sonra tüstü çəkildi deyə, təkrar sinifə daxil olublar. Olanlar bundan sonra olub.Hazırda evə təxliyyə olunan uşaqların səhhəti tam olaraq düzəlməyib, onlarla uşaq hadisədən 2 gün sonra da yenidən xəstəxanaya qaytarılıb. Hətta hazırda 4-5 nəfər uşaq Tovuz rayon MX-nın reanimasiya şöbəsinə yerləşdirilib. Tibbi müdaxilədən sonra yaxşılaşma halı müçahidə olunsa da gecələr yenidən zəhərlənmə fəsadları üzə çıxır. Hazırda təkrar müraciət edənlərin sayı artmaqda davam edir”

Göründüyü kimi, bir şəraitsiz məktəbin isitmə probleminə aidiyyəti qurumların biganə və başdansovdu yanaşması, böyük bir kəndə az qala faciə yaşada bilərdi.