Səfir: Mixeil Saakaşvilinin səhhətinin pisləşməsi ilə bağlı xəbərlər narahatlıq doğurur

“Biz Gürcüstan hakimiyyətinə deyirik ki, Mixeil Saakaşvilinin səhhətinin pisləşməsi ilə bağlı məlumatlar var və bu, bizi narahat edir”.

Bunu Almaniyanın Gürcüstandakı fövqəladə və səlahiyyətli səfiri Peter Fişer Gürcüstanın keçmiş prezidenti Mixeil Saakaşvilinin səhhətinə münasibət bildirərkən deyib.

Onun sözlərinə görə, Gürcüstan hökuməti həbsdə olan şəxsə adekvat tibbi xidmət göstərmək məsuliyyətini həmişə yadda saxlamalıdır.

“O, hər kəs kimi insandır və dövlətin nəzarətindədir, amma həm də keçmiş prezidentdir. Biz Gürcüstan hökumətindən xahiş edirik ki, həbsdə olan şəxsə adekvat tibbi xidmət göstərmək məsuliyyətini həmişə yadda saxlasın. Bu insan hüququdur. Həbsdə olan istənilən şəxsin bu hüququ var. Bunu təmin etmək hökumətin vəzifəsidir. Bundan əlavə, kömək edə biləcəyimiz hər hansı bir yol varsa, bizimlə əlaqə saxlamağınızı xahiş edirik. Biz kömək etmək istəyirik. Biz Mixeil Saakaşvili ilə bağlı mövqeyimizi belə bildiririk”, – Almaniya səfiri bildirib.