Tovuzda yanğın nəticəsində 1 nəfər tüstüdən zəhərlənib

Tovuzda yanğın olub.

Hadisə rayonun Azaflı kəndində, vətəndaşa məxsus tövlədə qeydə alınıb. Yanğına elektrik naqillərində yaranan qısaqapanma səbəb olub. Dərhal əraziyə FHN-nin Yanğından Mühafizə Hissəsinin Tovuz rayon şöbəsinin iki avtomobili və canlı qüvvəsi cəlb olunub. Yanğın lokallaşdırılıb və ətraf ərazilərə keçməsinin qarşısı alınıb, tövlədə olan heyvanlar xilas edilib.

Yanğın zamanı 51 yaşlı Qurban Sadıqov tüstüdən zəhərlənib. Zərərçəkən təcili yardım maşını ilə xəstəxanaya aparılıb. Ona tibbi yardım göstərilib, vəziyyəti kafi qiymətləndirilir.

Faktla bağlı araşdırma aparılır.

Hadisə barədə FHN də məlumat yayıb. Qeyd olunub ki, Tovuz rayonunun Azaflı kəndində ümumi sahəsi 80 m² olan tövlənin dam örtüyünün yanar konstruksiyaları və çardağına yığılan 2 ton ot bağlamasının 1 tonu yanıb. Yanğın zamanı 1 nəfər tüstüdən zəhərlənib. Ot bağlamalarının qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.