Yeganə Göyüşlü: ADA-tarix üzərinə tarix yazır

 Qazaxın ən qədim küçəsi. Bütün evlərin qırmızı kərpicdən tikildiyi, bir çoxunun dövrünün zəngin bəylərinə məxsus olan ikimərtəbəli mülklərin olduğu küçə. Qazax şəhərində sovetlərin əlindən qurtulub salamat qalan yeganə Qazax cümə məscidinin, İsrafil ağanın evinin və onun şərq memarlığı üslubunda tikilmiş hamamının olduğu meydanda Məşədi İbrahimin ikimərtəbəli mülkü. Azərbaycan Xalq Cümhuriyyətinin yaranması ilə Qoridən Qazaxa köçən Zaqafqaziya Müəllimlər Seminariyasının Azərbaycan bölməsinin Qazax Müəllimlər Seminariyası kimi fəaliyyətə başladığı bina. Məbədlərin olduğu yerdə məbədə çevrilən məkan. Təhsil məbədi. Qazaxlı comərd bəylərdən olan Məşədi İbrahimin təhsilə ərmağan etdiyi mülk. Öğlunun şərəfinə bütün övladların ixtiyarına bağışladığı ikimərtəbəli bəy evi. İçərisində əbədi işıq yanan məbəd!

  Demə, mülklərin, binaların da taleyi insanların taleyinə bənzəyirmiş. İnsan oğlu dünyaya gəlir və Uca Yaradan tərəfindən hər kəsin öz həyat missiyası yazılır. İnsan oğlu ev tikir, amma gör ki, onun taleyinə ziya və nur məbədi olmaq nəsib olur. Ona işıq missiyası verilir, taleyinə tarixilik və əbədiyyət yazılır. Onun təməlini, himini xoş niyyətli, uğurlu bir əl qoymuş. Eyni insan kimi, harada , hansı yaşda olmasına baxmayaraq insan öz tale rolunu ifa etdiyi kimi, bu bina da 1918-ci ildən başlayaraq öz məktəb fuksiyasını davam etdirir. Zamanın axınında bu qırmızı donlu Gözəlin üzünə suvaq çəkilir, libası köhnəlir, cavanlıq təravəti itir, amma qiymətli bir mücəvhər, inci kimi dəyərini itirmir. İlahinin hikmətinə bax ki, köksündən minlərlə övlada nur verən bu Gözəl , nurlu insanların əlinə düşür, ona yeni həyat verilir. Şux və olduqca qiymətli bir libas geydirilir, tutulmuş çöhrəsi açılır, işığını itirməkdə olan solğun gözləri yenidən parlayır. Yaşının tarixiliyi onu dəyərli edir, simasının müasirliyi onu füsunkar edir. Bu Gözəl vəhdət sərgiləyir! Bu Gözələ milyonlar aşiq! BU Gözəl şəfəq saçır! Millətin yolunu, gələcəyini aydınladır. Dünən də, bugün də və sabah da! Bu şəfəqə, nura milyonlar möhtac!

 Bu Gözəlin yeni bir imzası var: “ADA QAZAX MƏRKƏZİ” Onun tarixinə yeni bir səhifə açılır.Bu tarixi ADA yazır. ADA tarix üzərinə tarix yazır!