Təxribatlara son qoyulması üçün zəruri 5 prinsip – Tofiq Zülfüqarov

Bu cür təxribatların qarşısının alınması üçün bir sıra ekspertlər sərhəddə təhlükəsizlik zonasının yaradılmasının vacibliyi ilə bağlı fikirlər səsləndiriblər. Belə ki, bufer zonanın təşkilinin mövqelərimizin təhlükəsizliyinin təmin olunması üçün zəruri addım hesab olunur.

“Qərb xəbər” bildirir ki, mövzu ilə bağlı Bizim.Media–ya açıqlama verən sabiq xarici işlər naziri Tofiq Zülfüqarov bufer zonanın yaradılması ilə bağlı hələlik Azərbaycan rəsmiləri tərəfindən hər hansı açıqlama verilməyib:
“Bu istiqamətdə hansı addımların atılmasının vacibliyini hərbi vəziyyət göstərəcək. İndiki mərhələdə ilkin olaraq Azərbaycan zəruri addımları atır. Lakin əsas önəmli məqam Ermənistanın hansı səbəbdən təxribatlara əl atmasıdır. Burada maraqlı tərəflər çoxdur. Xüsusilə qeyd etmək lazımdır ki, son dövrlərdə müxtəlif səviyyələrdə revanşist fikirlər səsləndirilirdi və dalğa effekti ilə getdikcə artırdı. İndiki təxribatlar məhz bu siyasi dalğanın nəticəsidir”.

Tofiq Zülfüqarov Azərbaycan ilk növbədə hərbi təxribatlara son qoyulması ilə bağlı qarşı tərəfə xəbərdarlıq etməlidir:

“İkincisi, Rusiya sülhməramlılarının müvəqqəti nəzarətində olan bölgədə fəaliyyətlərini davam edən Ermənistan hərbçilərinin Azərbaycan ərazisini tərk etmələri tələb olunmalıdır.

Üçüncü tələb ondan ibarət ola bilər ki, Ermənistanın dövlət və qeyri-dövlət qurumları Azərbaycanın ərazi bütövlüyünə qarşı fəaliyyətlərini tam dayandırmalıdırlar.

Dördüncüsü, Azərbaycan tələb etməlidir ki, 10 noyabr bəyanatında əks olunan müddəalar Ermənistan tərəfindən yerinə yetirilsin, o cümlədən də Zəngəzur dəhlizinə aid olan öhdəliklər.
Beşinci məntiqli tələb isə bu ola bilər ki, Ermənistan siyasi rəhbərliyi Azərbaycana hərbi təcavüzə görə siyasi və maddi məsuliyyətini qəbul etsin, bundan irəli gələn addımları beynəlxalq qanunlara uyğun olaraq təmin etsin”.

“Azərbaycan bu məsələlərə çox ciddi yanaşıb, başa salmalıdır ki, bu oyunlara son qoymaq lazımdır”, – deyə sabiq nazir əlavə edib.