Politoloq: 1 iyul tarixində alternativ Laçın dəhlizinin açılışı reallaşacaq

Son vaxtlar Laçın və Kəlbəcərdə aktivlik müşahidə edilir. Belə ki, iyunun 18-i axşam saatlarında və 19-na keçən gecə Ermənistan silahlı qüvvələrinin bölmələri dövlət sərhədinin Basarkeçər rayonunun Zərkənd və Yuxarı Şorca yaşayış məntəqələrində yerləşən mövqelərindən Kəlbəcər rayonunun Yuxarı Ayrım, Barmaqbinə və Zivel yaşayış məntəqələri istiqamətlərində yerləşən mövqeləri intensiv atəşə tutub.

Bundan başqa iyunun 20-si gecə saatlarından başlayaraq iyunun 21-i səhər saatlarınadək dövlət sərhədinin Qarakilsə rayonunun Saybalı, Basarkeçər rayonunun Aşağı Şorca yaşayış məntəqələrində yerləşən mövqelərindən Azərbaycan Ordusunun Laçın rayonunun Minkənd və Kəlbəcər rayonunun Yellicə yaşayış məntəqələri istiqamətlərindəki mövqelərini müxtəlif çaplı atıcı silahlardan fasilələrlə atəşə tutub.

Bununla bağlı  “Qərb Xəbər“ə politoloq Ramil Məmmədli  danışıb. Onun sözlərinə görə, 1 iyul tarixində alternativ Laçın dəhlizinin açılışı reallaşacaq. “Yeni yolun açılması o deməkdir ki, Ermənistanla Dağlıq Qarabağı birləşdirən Laçın şəhəri və ətraf ərazilər birbaşa Azərbaycanın nəzarətinə keçəcək. Bu da Ermənistan tərəfini ciddi narahat edir. Hətta, bununla bağlı təxribat xarakterli fikirlərin səsləndirilməsinin də şahidi oluruq”.

Politoloq əlavə edib ki, ümumilikdə isə həm Kəlbəcər, həm də Laçın istiqamətində təxribatların baş verməsi birbaşa Ermənistan dövlətinin tapşırığı nəticəsində baş verir.

“Ermənistan belə düşünür ki, bölgədə nə qədər təxribat baş verərsə, qarşıdurma olarsa bu münaqişəyə beynalxalq ictimaətin baxış imkanları dahada  da artacaq. Azərbaycan tərəfi belə halların qarşısını alınması üçün siyasi iradə nümayiş etməlidir. Əgər, siyasi iradə göstərilməzsə, Qarabağda yeni münaqişə ocağının yaranmasına imkan yaradacaq. Bu proseslər bir dəfəlik öz həllini tapmalıdır ki, gələcək  nəsillər bu problemdən əziyyət çəkməsin”.

Rahib İsgəndərli