EBRD Gəncəyə 10 milyon avro sərmayə ayıracaq

Avropa Yenidənqurma və İnkişaf Bankı (EBRD) bərk məişət tullantılarının idarə olunması sahəsində təkmilləşdirmələr üçün Gəncəyə 10 milyon avro sərmayə ayıracaq.

“Qərb Xəbər” bildirir ki, bu barədə Gəncə Şəhər İcra Hakimiyyəti (ŞİH) məlumat yayıb.

Məlumata görə, bu gün EBRD-nin I vitse-prezidenti Yurgen Rigterink, maliyyə naziri Samir Şərifov və Gəncə ŞIH-in başçısı Niyazi Bayramov arasında saziş imzalanıb. Layihə Gəncənin Bankın “Yaşıl Şəhərlər” proqramına cəlb edilməsinin bir hissəsidir və bununla bağlı “Tədbirlər Planının inkişafına təkan verəcək. Bu əməkdaşlıqdan 300 000-dən çox insan faydalanacaq.

10 milyon avroluq kredit tullantıların ağıllı toplanması və marşrutun optimallaşdırılması sistemlərinin tətbiqinə sərf olunacaq. Yeni konteyner növləri, mövcud tullantı parkının təkmilləşdirilməsi və daha “yaşıl” nəqliyyat vasitələrinin tətbiqi şəhərin kommunal xidmətlərində karbon izinin əhəmiyyətli dərəcədə azalmasına imkan verəcək. Bugünkü razılaşma müasir regional sanitar poliqonun tikintisi ilə bərk məişət tullantılarının təkmilləşdirilməsinin başa çatdırılmasına yönəlmiş növbəti layihəyə yol açacaq.

Tullantıların toplanması xidmətlərinin əhatə dairəsinin artırılması və genişləndirilməsi tullantıların nəzarətsiz yandırılmasını minimuma endirəcək, eyni zamanda əhalinin sağlamlığının və ümumi ətraf mühitin yaxşılaşmasına imkan verəcək. Bu tədbirlər həmçinin kommunal xidmət sahəsi işçilərinin iş şəraitinin yaxşılaşdırılması məqsədi daşıyır.

5 milyard avro dəyərində olan EBRD “Yaşıl Şəhərlər” proqramı üzv şəhərlərə xüsusi olaraq “Yaşıl Şəhər” Tədbirlər Planı hazırlamaq və hər bir şəhərin şəhər problemlərini həll etmək üçün məqsədyönlü sərmayələr etməklə, ən aktual ekoloji problemlərini müəyyən etmək, prioritetləşdirmək və həll etmək üçün dəstək verir. Gəncə bu proqrama 2020-ci ildə qoşulub. Hazırda “Yaşıl Şəhərlər” proqramının 56 üzv şəhəri var.

EBRD Azərbaycanda mühüm institusional investordur. Bu günə qədər Bank ölkəyə 181 layihə vasitəsilə 3,5 milyard avrodan çox sərmayə yatırımı edib. Bankın ölkədəki strategiyası Azərbaycanda iqtisadiyyatın şaxələndirilməsinə və qeyri-neft sektorlarında özəl sektorun inkişafına kömək etmək səylərinə yönəlib.