Xalq artisti vəfat etdi

Xalq artisti, Dövlət Mükafatı laureatı Hacı Murad Yegizarov vəfat edib.

Qerbxeber.com xəbər verir ki, bu barədə xalq yazıçısı Natiq Rəsulzadə məlumat yayıb.

Bildirilib ki, o, bu gün uzun sürən xəstəlikdən sonra Almaniyada dünyasını dəyişib.

Qeyd edək ki, Hacı Murad Hacı Əhməd oğlu Yegizarov 18 iyul 1939-cu ildə Bakıda anadan olub. M. A.Əliyev adına Azərbaycan Dövlət İncəsənət İnstitutunun Aktyorluq fakültəsində Məhərrəm Haşımovun kursunda təhsil alıb.1962-ci ildən Səməd Vurğun adına Azərbaycan Dövlət Rus Dram Teatrında işləyib. Onlarla Azərbaycan filmində müxtəlif baş və ikinci dərəcəli obrazları canlandırıb. “Azərbaycan SSR əməkdar artisti”, “Azərbaycan SSR xalq artisti”, Azərbaycan SSR Dövlət mükafatı, “Qızıl Dərviş” mükafatlarına layiq görülüb.

Prezident İlham Əliyevin müvafiq sərəncamları ilə “Şöhrət” və “Şərəf” ordenləri ilə təltif edilib.