Tbilisidə müxalifətin genişmiqyaslı etiraz aksiyası keçirilib

Paytaxt Tbilisidə Avlabari metrostansiyasından “Güc birlikdə, güc Avropadadır” şüarı ilə genişmiqyaslı yürüş başlayıb.

Qerbxeber.com 24News.ge istinadən xəbər verir ki, aksiya ölkədə son dövrlərdə siyasi səbəblərlə həbs olunmuş şəxslərə dəstək məqsədi daşıyır və Avropa dəyərlərinə sadiqliyin nümayişi kimi qiymətləndirilir.

Yürüşdə yüzlərlə insan – saxlanılanların ailə üzvləri, vətəndaş cəmiyyəti nümayəndələri, müxalifət partiyalarının təmsilçiləri və sadə vətəndaşlar iştirak ediblər. Aksiya iştirakçıları “Rejim məhbuslarına azadlıq” kimi çağırışlar əks olunan bannerlər və saxlanılan fəalların fotoşəkilləri ilə yürüş ediblər. Eyni zamanda müxtəlif Avropa İttifaqı simvolları və Gürcüstan bayraqları da nümayiş etdirilib.

Yürüşçülər Avropa meydanına doğru irəliləyiblər. Meydanda səhnə və texniki avadanlıq quraşdırılıb. Tədbirin əsas hissəsi burada davam etdirilib. Tribunadan bir-bir çıxış edən saxlanılanların yaxınları, hüquq müdafiəçiləri, həkimlər, fəallar və sənət adamları – hökuməti siyasi təqiblərə son qoymağa çağırıblar. Onlar həmçinin Gürcüstanın Avropa İttifaqına inteqrasiyası yolunda demokratik dəyərlərin qorunmasının vacibliyini vurğulayıblar.

Təşkilatçılar bildiriblər ki, bu aksiyanın əsas məqsədi ictimai diqqəti məhbuslara və insan haqlarına yönəltmək, eləcə də hakimiyyətin Avropa standartlarına uyğun fəaliyyət göstərməsinə çağırış etməkdir.