Son 20 ildə 32 mindən çox şəxsin xarici təhsil sənədi tanınıb

“2003-cü ildən bu günə kimi 32 mindən çox şəxsin xarici təhsil sənədi tanınıb.

“Qərb Xəbər” məlumat verir ki, bunu Təhsildə Keyfiyyət Təminatı Agentliyinin İdarə Heyətinin sədri vəzifəsinin müvəqqəti icraçısı Kamran Rəsulov “Xarici dövlətlərin ali təhsilə aid kvalifikasiyalarının tanınması: prosedurlar və diqqət yetirilməli məqamlar” mövzusunda keçirilən konfransda deyib.

O bildirib ki, ötən il 3530 nəfərin xarici sənədinin ekspertizası həyata keçirilib:

“Cari ilin 15 noyabrına qədər 6144 ərizəçinin sənədinin ekspertizası aparılıb. Bu, keçən illə müqayisədə 74 faiz çoxdur. Ərizələrə baxılma müddəti 3 aydan 10 iş gününə endirilib”.