“Səmimi ümid edirik ki, Gürcüstan bir gün Avropa İttifaqının üzvü olacaq” – Səfir Herçinski

Avropa İttifaqının Gürcüstandakı səfiri Pavel Herçinski Gürcüstan Universitetinin təşkil etdiyi “Avropa nədir…? Yeni Avropaya uzun ömür!” adlı konfrans çərçivəsində jurnalistlərə açıqlama verib.

Qerbxeber.com   Aktual.ge-ə istinadən xəbər verir ki, tədbirin təşkili üçün universitet rəhbərliyinə təşəkkürünü bildirib və Gürcüstanın Aİ-yə inteqrasiya perspektivləri barədə danışıb.

“Avropanın gələcəyinə həsr olunmuş bu əhəmiyyətli illik konfrans üçün Gürcüstan Universitetinə minnətdaram. Universitet, Avropa məsələləri üzrə aparıcı tədqiqatçıları və alimləri bir araya gətirməyə nail olub. Bildiyiniz kimi, dünya çox sürətlə dəyişir və bu dəyişikliklər daha az proqnozlaşdırıla biləndir. Bu səbəbdən Avropanın da dəyişməyə, yeni reallıqlara uyğunlaşmağa ehtiyacı var. Burada – Tbilisidə, bu məsələlər üzərində düşünən alim və mütəxəssislərin olması çox vacibdir. Fikirlərimi bölüşmək imkanı qazandığım üçün məmnunam”, – deyə səfir qeyd edib.

Pavel Herçinski həmçinin Gürcüstanın Avropa İttifaqına üzvlük perspektivlərinə də toxunub:

“Hamımız bilirik ki, Gürcüstan Aİ-yə namizəd ölkədir və biz səmimi şəkildə ümid edirik ki, bir gün Gürcüstan Avropa İttifaqının üzvlərindən biri olacaq. Bu baxımdan, gürcü alim və tədqiqatçılarının səsi, Avropanın gələcəyi və uyğunlaşma yolları ilə bağlı beynəlxalq müzakirələrdə mühüm rol oynayır. Qarşıdakı iki günlük intensiv fikir mübadiləsini səbirsizliklə gözləyirəm və sevindirici haldır ki, mən də bu prosesə töhfə verə bilirəm.”