Qazax rayonu ərazisində təbii qazın verilməsində məhdudiyyət yaranıb. Belə ki, səhər saatlarından rayonun kəndləri də daxil olmaqla mərkəzində qaz yoxdur.
“Qərb Xəbər” açıqlama almaq üçün Şəmkir Regional Qaz İstismar İdarəsinin Qazax xidmət sahəsinə müraciət edib.
Xidmət sahəsinin rəisi Səbuhi Əliyev bildirib ki, qaz paylayıcı məntəqələrdə baş vermiş sızmaya görə qazın verilməsi müvəqqəti dayandırılıb: “Problem saat 17:00-a qədər aradan qaldırılacaq”.
Qeyd edək ki, qərb bölgəsində son dövrlər qazın verilməsində tez-tez fasilələr yaranır. Məsələni diqqətdə saxlayacağıq.