Qazaxda erkən nikahlar müzakirə olunub

Bu gün Qazax Rayon İcra Hakimiyyətinin dəstəyi və Qazax Gənclərin İnkişaf və Karyera Mərkəzinin təşkilatçılığı ilə Yuxarı Salahlı kənd Z.Mahmudov adına tam orta məktəbdə “Erkən nikahlar və onların doğurduğu ağır fəsadlar” mövzusunda maarifləndirici görüş keçirilib.

Tədbirdə orta məktəbin yuxarı sinif şagirdləri, müəllimlər, valideynlər və ziyalılar iştirak edib. İlk öncə tədbiri giriş sözü ilə Qazax Gənclərin İnkişaf və Karyera Mərkəzinin direktoru İsmayıl Süleymanov açdıqdan sonra, Qazax rayon Qeydiyyat şöbəsinin müdiri Məsumə Səmədova nikahların ümumi statistikası, erkən nikahların cəmiyyətimiz üçün doğura biləcəyi ağır nəticələr barədə geniş çıxış edib.

Daha sonra kənd bələdiyyəsinin sədri Şahismayıl Məmmədov və məktəbin direktoru Məhəmməd Qocayev bu tipli maarifləndirici tədbirlərin tez-tez keçirilməsinin vacibliyini vurğulayıblar.

Qeyd edək ki, tədbirdə həmçinin Yuxarı Salahlı kənd icra nümayəndəsi Nəsib Şəmşiyev və Qazax rayon Polis şöbəsinin Yuxarı Salahlı kəndi üzrə sahə müvəkkili, polis mayoru Qoşqar Əhmədov iştirak edirdi.