Gürcüstanın xarici siyasəti ölkə parlamenti və hökumət tərəfindən müəyyən edilərək həyata keçirilir, ona görə də Prezidentin istənilən görüşü və səfəri Gürcüstan hökuməti ilə razılaşdırılmalıdır.
“Qərb Xəbər” məlumat verir ki, bunu Gürcüstanın Baş naziri İrakli Qaribaşvili jurnalistlərə açıqlamasında deyib.
O bildirib ki, Prezidentin xarici səfərləri ilə bağlı Gürcüstan hökuməti ilə razılaşmaq öhdəliyi var.
Baş nazir hökumətin Salome Zurabişviliyə xaricə səfər üçün icazə verməməsini hazırkı beynəlxalq vəziyyətlə izah edib. O vurğulayıb ki, hökumətin bütün üzvləri Ukraynada genişmiqyaslı müharibə kimi çətin regional proseslərin getdiyi bir dövrdə Prezidentin ölkədə qalmasını məqsədəuyğun hesab edir və bu səbəbdən hökumət onun xaricə səfərinə razı olmayıb.
Qaribaşvili qeyd edib ki, Gürcüstan konstitusiyası hökumətə Prezidentin bu cür səfərlərinə icazə verib-verməmək səlahiyyəti verir.
Qeyd edək ki, Gürcüstanın hakim “Gürcü Arzusu” partiyası bu gün Prezident Salome Zurabişvilini xaricə səfərləri ilə bağlı ölkə Konstitusiyasını pozmaqda ittiham edərək Konstitusiya Məhkəməsinə verəcəyini bəyan edib.