Premyer Liqa: “Kəpəz” “Səbail”i, “Zirə” “Neftçi”ni qəbul edəcək

Bu gün futbol üzrə Azərbaycan Premyer Liqasında XXVIII turun daha iki oyunu keçiriləcək.

“Qərb Xəbər”in məlumatına görə, günün ilk matçı Gəncədə “Kəpəz”lə “Səbail” arasında baş tutacaq.

Hazırda Qərb təmsilçisi 22 xalla səkkizinci, Bakı klubu isə 18 xalla sonuncu – 10-cu pillədə qərarlaşıb. Komandalar indiyədək ölkə çempionatında yeddi dəfə üz-üzə gəliblər. Bunların ikisində meydan sahibləri, dördündə qonaqlar qələbə qazanıblar. Bir görüş heç-heçə ilə başa çatıb. Topların nisbətində də “sarı-göylər” rəqibindən geri qalırlar – 9:11.

“Kəpəz” evdə ən azı iki qol vurub. Gəncə təmsilçisinin meydanındakı matçlarda üç və ya daha çox qol qeydə alınıb.

Günün digər matçında isə 56 xalla üçüncü sırada yer alan “Neftçi” 37 xalla dördüncü pillədə qərarlaşan “Zirə”nin qonağı olacaq. Komandalar arasında bunadək baş tutan 29 Premyer Liqa oyununda “qartallar”ın üstünlüyü nəzərə çarpır – 12 qələbə. “Ağ-qaralar” isə 10 qarşılaşmada rəqibini məğlub edib. Yeddi görüşdə bərabərlik qeydə alınıb. Qol sayında isə Laurentsiu Regekampfın baş məşqçisi olduğu komanda öndədir – 33:28.

“Neftçi” son üç oyunda qalib gəlib. “Zirə” son altı ev matçından yalnız birində qol vurmayıb.

Azərbaycan Premyer Liqası

XXVIII tur

1 aprel (şənbə)

15:30. “Kəpəz” – “Səbail”

Hakimlər: Tural Qurbanov, Vüsal Məmmədov, Şirmamed Mamedov, Kamal Umudlu

Hakim-inspektor: Munis Abdullayev

AFFA nümayəndəsi: Əsgər Əmirəliyev

Gəncə şəhər stadionu.

19:30. “Zirə” – “Neftçi”

Hakimlər: Nicat İsmayıllı, Kamran Bayramov, Cəmil Quliyev, Emin Əliyev

Hakim-inspektor: Barış Şimşek

AFFA nümayəndəsi: Ramiz Mustafayev

“Zirə” İdman Kompleksinin stadionu.

Qeyd edək ki, açılış oyununda “Sumqayıt” səfərdə “Turan Tovuz”u 3:2 hesabı ilə məğlub edib. Tura aprelin 2-də keçiriləcək “Şamaxı”-“Qarabağ” və “Sabah”-“Qəbələ” görüşləri ilə yekun vurulacaq.