Mədəniyyət naziri Anar Kərimov avqustun 31-də Ağstafa rayon Heydər Əliyev Mərkəzində Qazax, Ağstafa və Tovuz rayonlarından olan vətəndaşların qəbulunu keçirib.
“Qərb Xəbər” məlumat verir ki, nazir Ağstafada tarixi abidəyə və bir sıra mədəniyyət müəssisələrinə baxış keçirib. AMEA-nın Arxeologiya və Etnoqrafiya və Antropologiya İnstitutu tərəfindən Ceyrançuxur dərəsində “Ağstafa Gənclər evi” sosial xidmət müəssisəsi könüllülərinin də iştirakı ilə aparılan arxeoloji qazıntılara baxış keçirilib və “Yay məktəbi 2” layihəsi çərçivəsində Ceyrançuxur kurqanı ilə tanışlıq olub.
Məlumat üçün qeyd edək ki, dövlət başçısının 19 dekabr 2007-ci il tarixli sərəncamı ilə sözügedən ərazi maddi mədəniyyət abidələrinin daha da dərindən öyrənilməsi, qorunması və təbliği məqsədilə “Keşikçidağ” Dövlət Tarix-Mədəniyyət Qoruğu elan edilib.