Müxtəlif xalqlardan olan iranlı müəllimlər İran parlamentinin qeyri-fars dillərin məhdud tədrisini nəzərdə tutan qanun layihəsini təsdiq etməməsinə etiraz ediblər.
Qerbxeber.com xəbər verir ki, bu barədə İran Təhsil İşçiləri Həmkarlar İttifaqı Təşkilatlarının Koordinasiya Şurasının bəyanatında bildirilib.
Bəyanat müəllifləri İran parlamentinin bu hərəkətini ölkədə başqa dillərə olan ögey münasibətin nümunəsi adlandırıb, bunu sistemli şəkildə tətbiq edilən dil ayrı-seçkiliyi kimi dəyərləndiriblər:
“Birləşmiş Millətlər Təşkilatının İnsan Hüquqları Konvensiyasına əsasən, ana dilində təhsil milliyyətindən və dilindən asılı olmayaraq, bütün insanların əsas və təbii hüquqlarından biridir. İran hökuməti isə 40 ildən çoxdur buna əhəmiyyət vermir və mədəniyyətlərə, dillərə qarşı repressiyalarını davam etdirir”.
Qeyd edək ki, fevralın 26-da İran parlamentinin açıq iclasında qeyri-fars dillərin həftədə 2 saat tədrisini nəzərdə tutan qanun layihəsi səsvermədən keçməyib.
Bu, İranın qeyri-fars xalqlarının etirazına səbəb olub. Hökumət isə qanun layihəsinin müəyyən redaktələrlə yenidən parlamentə təqdim ediləcəyini açıqlayıb.
