HAMAS-la döyüşdə öldürülən İsrail hərbçisinin babası Qarabağda şəhid olubmuş
İsrail səfirliyi HAMAS-la döyüşdə həlak olan Azərbaycan əsilli İsrail vətəndaşı barədə paylaşım edib.
“Qərb Xəbər” məlumat verir ki, İsrailin Azərbaycandakı səfirliyi bu barədə “X” hesabında paylaşıb.
“İsrailin Azərbaycandakı səfirliyi olaraq oktyabrın 7-də HAMAS-a qarşı hərbi əməliyyatlar zamanı Azərbaycan əsilli 20 yaşlı serjant Lior Əzizovun həlak olmasından dərin kədər hissi keçiririk. Lior Qolani briqadasının döyüşçüsü idi. Liorun atası Timur 2005-ci ildə İsraildə terror aktının qurbanı olub və 5 il sonra aldığı fiziki və psixi xəsarətlərdən dünyasını dəyişib. Babası Vahid Əzizov 1992-ci ildə Birinci Qarabağ müharibəsi zamanı qəhrəmancasına həlak olub və Şəhidlər Xiyabanında dəfn olunub. Bir ailənin üç nəsil boyunca ağrı və itkilərinə sonsuz hüznlə yas tuturuq. Liorun anası Natali onu belə xatırlayır: O, həkim və rəssam olmaq istəyən ağıllı, həssas uşaq idi. Onunla ilk söhbətimiz şənbə günü, müharibənin ilk günündə oldu. Dedi ki, “burda atışma gedir, amma yaxşıyam, narahat olma. Ana, yenə zəng edəcəm, söz verirəm və səni sevirəm”. Və bu ondan gələn son zəng oldu. Liorun və Əzizovlar ailəsinin həyatdan köçmüş digər üzvlərinin ruhları şad olsun”, səfirliyin paylaşımında bildirilib.
