Avropa və Rusiya gərginliyi pik həddə: Leyen Putinə yırtıcı dedi

Avropa Komissiyasının sədri Ursula Von der Leyen Latviyaya səfəri zamanı Rusiya prezidenti Vladimir Putin haqqında sərt fikirlər səsləndirərək onu “yırtıcı” adlandırıb.

Bu barədə “The Guardian” nəşri məlumat yayıb.

Siyasətçi bildirib ki, Avropa gələcək risklərə hazır olmalıdır.

Von der Leyen Latviyanın Avropada pilotsuz təyyarələrlə mübarizədə əsl mərkəz rolunu oynadığını vurğulayıb və ölkənin regionda NATO təhlükəsizliyinin möhkəmləndirilməsinə verdiyi töhfəni qeyd edib. O, Avropanın yalnız şərq sərhəddi etibarlı şəkildə qorunduğu zaman təhlükəsiz olduğunu açıqlayıb və Avropa İttifaqını mümkün təhdidlərə fəal hazırlaşmağa çağırıb.

“Putin yırtıcıdır, onlar illərdir hibrid və kiber hücumlarla cəmiyyətimizə zərər vururlar”, – Leyen deyib.

Avropa Komissiyasının rəhbəri onu da vurğulayıb ki, sabitlik və təhlükəsizliyin təmin edilməsi üçün artan risk və çağırışlara cavab vermək lazımdır.

“Ölkənizin və digər Baltikyanı dövlətlərin bizə xəbərdarlıq etdiyi risklər təəssüf ki, reallaşdı”, – deyə Leyen vurğulayıb.