Avropa İttifaqı: “Gürcü Arzusu” Aİ barədə dezinformasiya yayır

Qerbxeber.com  Gürcüstan mediasına istinadən xəbər verir ki, Avropa İttifaqının Xarici Əlaqələr və Təhlükəsizlik Siyasəti üzrə sözçüsü Ənuar əl Ənani tərəfindən verilən bəyanatda qeyd olunub ki, Avropa İttifaqı Gürcüstan hakimiyyəti tərəfindən Aİ-nin ölkədəki rolu barədə yayılan dezinformasiyanı və əsassız ittihamları qətiyyətlə rədd edir və pisləyir.

“Son dövrlərdə yayılan yalan məlumatlar – guya Aİ-nin Gürcüstanda sabitliyi pozmaq, ölkəni müharibəyə cəlb etmək və ya guya ‘ənənəvi olmayan dəyərləri’ zorla tətbiq etdirmək niyyəti ilə hərəkət etdiyi barədə – cəmiyyəti bilərəkdən aldatmağa yönəlmiş cəhdlərdir” , – bəyanatda deyilir.

Bəyanatda vurğulanır ki, “Rusiya tərzli konspirasiya nəzəriyyələri” və bölücülük xarakteri daşıyan ritorika yalnız Gürcüstanın demokratik və Avropa yoluna qarşı çıxanların maraqlarına xidmət edir və bu ritorika Aİ–Gürcüstan münasibətlərinin altını qazır.

“Gürcüstanda Avropa İttifaqının səfiri Pavel Herçinskiyə qarşı həyata keçirilən şəxsi hücumları qətiyyətlə pisləyirik. Səfir, Aİ və Gürcüstan arasında münasibətlərin gücləndirilməsində həyati əhəmiyyətə malikdir. O, Avropa İttifaqının tam etimadı və dəstəyi ilə fəaliyyət göstərir.

Gürcüstanda fəaliyyət göstərən bütün siyasi fiqurları dezinformasiyanın yayılmasından çəkinməyə, təxribat xarakterli şəxsi hücumlardan uzaq durmağa və ölkə əhalisinin Avropa gələcəyi naminə çalışmağa çağırırıq.

Avropa İttifaqı Gürcüstanın ardıcıl və etibarlı tərəfdaşı olaraq qalır. Aİ bir daha Gürcüstanın ərazi bütövlüyünə dəyişməz dəstəyini, gürcü xalqı ilə sarsılmaz həmrəyliyini və onların Avropa gələcəyinə doğru yolunda dəstəyini davam etdirməyə tam hazır olduğunu təsdiqləyir” , – qeyd olunub.