Prokuror: Bidzina İvanişvilinin minlərlə bitkoini oğurlanıb

“Birgə İnvestisiya Fondunun keçmiş rəhbəri Giorgi Baçiaşvili ‘Gürcü Arzusu’nun təsisçisi Bidzina İvanişviliyə məxsus olan 8 min 986 bitkoini mənimsəmişdir”.

Qerbxeber.com Aktual.ge istinadən xəbər verir ki, bu barədə Tbilisi Şəhər Məhkəməsindəki çıxışı zamanı prokuror Mixeil Sadradze açıqlama verib.

Onun sözlərinə görə, sözügedən bitkoinlərin dəyəri 2017-ci ildə təxminən 43 milyon ABŞ dollarına bərabər idi. Onun sözlərinə əsasən, Baçiaşviliyə qarşı irəli sürülən ittihamlar sübutlarla təsdiqlənir və sübutların əksər hissəsi sənədlərdən ibarətdir.

Prokuror həmçinin qeyd edib ki, müttəhim tərəfindən faktiki olaraq etiraf xarakteri daşıyan sübutlar da araşdırılacaq ki, bu da həm mənimsəmə, həm də pul yuyulması ittihamlarının təsdiqlənməsini göstərir. O deyib ki, məhkəmədə uyğun mandatla iştirak edən şəxslər də dindiriləcək və ittiham tərəfinin təqdim etdiyi sübutlar ən yüksək keyfiyyətə malikdir.

Dövlət ittihamı Giorgi Baçiaşvilinin tam şəkildə təqsirli bilinməsini tələb edir.

Məlumat üçün bildirək ki, Giorgi Baçiaşviliyə qarşı irəli sürülən ittiham 2017-ci ildə baş vermiş əməliyyata aiddir. Belə ki, prokurorluğun məlumatına görə, Baçiaşvili investordan qoyulan sərmayədən əldə edilən tam qazanc əvəzinə cəmi 536 min 900 ABŞ dolları qaytarmış, qalan 8,986 bitkoini isə qanunsuz şəkildə mənimsəmişdir. Bu bitkoinlərin dəyəri mənimsəmə zamanı təxminən 43 milyon ABŞ dolları təşkil edirdi.

Giorgi Baçiaşvili isə irəli sürülən ittihamları qəbul etmir. Qeyd edilən hərəkət 9 ildən 12 ilədək azadlıqdan məhrumetmə cəzasını nəzərdə tutur.