Avropalı deputatlar Tbilisidə keçirilən aksiyada iştirak ediblər

Tbilisidə səfərdə olan Finlandiya, Almaniya, Litva və Çexiya parlamentlərinin xarici əlaqələr komitələrinin sədrləri parlament binası qarşısında keçirilən aksiyada iştirak ediblər.

Qerbxeber.com xəbər verir ki, Rustaveli prospektinə gələn komitə sədrləri “Xarici təsirin şəffaflığı haqqında” qanununa etiraz edən aksiya iştirakçılarına dəstəklərini ifadə ediblər.

Bundestaqın xarici əlaqələr komitəsinin sədri Mixael Rot mitinqdə çıxışı zamanı hakim “Gürcü Arzusu” partiyasını “gürcü kabusu” adlandırıb:

“Tbilisi bu gün Avropanın həqiqi paytaxtıdır və biz sizinlə fəxr edirik. Sizin mübarizəniz bizim mübarizəmizdir və siz bizdən sadəcə sözlər deyil, daha çox şey gözləməlisiniz…

Bu gün bizdən bir jurnalist “gürcü kabusu”nun seçicilərinə nə demək istədiyimizi soruşdu. Bizim cavabımız sadə idi – gənc nəsli dinləyin, uşaqlarınızı, bacı və qardaşlarınızı dinləyin”, – deyə almaniyalı komitə sədri bildirib.

Komitə sədrləri qeyd ediblər ki, Gürcüstan parlamentini ziyarət etmək istəsələr də qapılar bağlı olub:

“Sizin nümayəndələriniz bizi qəbul etmədilər və bizi dinləmədilər, lakin biz sizin səsinizi eşidirik və onlar bizə parlamentə daxil olmağa icazə vermirlərsə, bura gələrik. Sizin azadlıq uğrunda mübarizəniz bizim mübarizəmizdir”, – deyə parlamentarilər bildiriblər.