Qazaxda “Qəhrəmanlarımızı tanıyaq!” adlı tədbir keçirilib

Gənclərin İnkişaf və Karyera Mərkəzinin Qazax-Tovuz regional nümayəndəliyinin təşkilatçılığı “Qəhrəmanlarımızı tanıyaq!” layihəsi çərçivəsində İkinci Qarabağ müharibəsində qəhrəmancasına həlak olmuş leytenant, tank taqımı komandiri Murad Nağıyev haqqında təqdimat keçirilib.

“Qərb Xəbər” xəbər verir ki, təqdimat zamanı şəhid Murad Nağıyevin həyat və döyüş yolu haqqında çıxış edilib, onun bu günümüz üçün şərəfli tarix yazdığını vurğulanıb.

Tədbirdə şəhidin yaxın qohumları da iştirak edib. Xalası Tahirə xanım Məhəmmədi çıxışında Muradın uşaq yaşlarından incəsənətə də maraq göstərdiyini, müxtəlif musiqi alətlərində ifa etməyi öyrəndiyini, həmçinin həm türkcə, həm də ana dilində şeirlər yazdığını bildirib. Daha sonra şəhidin qələmindən çıxan şeirlər səsləndirilib.
Qeyd edək ki, şəhid Murad Nağıyev 9 fevral 1997-ci ildə Qazax rayonunda anadan olub. O, oktyabrın 11-də Cəbrayıl istiqamətindəki döyüşlərdə qəhrəmancasına şəhidlik zirvəsinə ucalıb.

Murad Nağıyev ölümündən sonra Azərbaycan Respublikasının Prezidenti İlham Əliyevin sərəncamları ilə Murad Nağıyev “Vətən uğrunda”, “Cəbrayılın azad olunmasına görə” medalları və 3-cü dərəcəli “Vətənə xidmətə görə” ordeni ilə təltif edilib.