Tbilisidə Azərbaycandilli Məktəblərin Müəllimlərinin I Qurultayı keçiriləcək
25 iyun tarixində Tbilisidə Gürcüstanda Azərbaycandilli Məktəblərin Müəllimlərinin I Qurultayı keçiriləcək.
Bu barədə”Qərb Xəbər” 24News.ge portalına istinadən Maarif təşkilatının və qəzetinin rəhbəri Ələddin Qarabağlı məlumat verib. ”
O qeyd edib ki, Gürcüstan tarixində ilk dəfə baş tutacaq Müəllimlərin I Qurultayında Gürcüstanın təhsil və elm nazirliyinin, diplomatik korpus və səfirliklərin, “Müəllimlər Evi”nin, Gürcüstan parlamentinin, Gürcüstanın Xalq Müdafiəçisinin əməkdaşları, eləcə də Gürcüstanda fəaliyyət göstərən Azərbaycan məktəblərində dərs deyən müəllimlər iştirak edəcək.
Onun sözlərinə görə, Qurultayda Azərbaycandilli məktəblərdə yaşanan problemlər və həlli yolları müzakirə ediləcək. Üç panel görüşdən ibarət olan qurultayda məruzəçilər ana dili, dövlət dili, inkluziv təhsil, ibtidai sinif müəllimləri, müəllimlərin statusları ilə bağlı mövzulara toxunacaqlar.
Qeyd edək ki, Qurultay “Maarif” təşkilatı, “SALAM” platforması və “Qafqaz və Hüquq İnteqrasiya Mərkəzi”nin birgə təşkilatçılığı ilə həyata keçiriləcək.
