Politoloq: “İran Azərbaycan və Ermənistan arasında gərginliyin qalmasında maraqlıdır”

“İran daxilində keçən aydan başlanan etiraz aksiyalarının davam etməsi və hələ də səngiməməsi, həmçinin bütün ölkə ərazisinə yayılması ciddi prosesdir”. Bu sözləri “Qərb Xəbər”ə açıqlamasında politoloq Oktay Qasımov deyib.

Politoloq qeyd edib ki, bu prosesin çox müxtəlif səbəbləri var. Onlardan birincisi rejimin sərt üsul və qaydalarıdır. O cümlədən orta əsrlərə məxsus idarə etmə İran cəmiyyətini yormaqdadır.

“Nəzərə almaq lazımdır ki, İranda ciddi şəkildə iqtisadi problemlər var. İran dünyada terrorizmi dəstəkləyir və qeyri-qanuni nüvə silahlanması istiqamətində fəaliyyət göstərir. Silahlarla bağlı İrana ciddi sanksiyalar tətbiq olunub. Bu sanksiyalar da iqtisadiyyata mənfi təsir göstərir. İran rejimi müvafiq addımlar atmasa, mövcud problemlər davam edəcək. İnsanların geyimi ilə bağlı sərt qaydalar yəqin ki, yumşaldılacaq”.

İranın Azərbaycan və Türkiyə sərhədlərində hərbi təlimlər keçirməsinə münasibət bildirən Oktay Qasımov İranın  sərhədlərdə təlim keçirməsini desturiktiv fəaliyyət adlandırıb.

“Bölgədə sülhün və əməkdaşlıq mühitinin formalaşmasına qarşı yönəlmiş hərəkətdir. Bölgədə gərginliyin qalmasına yönəlmiş addımdır. İran Azərbaycan və Ermənistan arasında gərginliyin qalmasında maraqlıdır. İran hesab edir ki, belə olduğu halda bölgədə söz sahibi olacaq. Digər tərəftən İranın bu addımları Zəngəzur dəhlizinin açılmasına qarşı yönəlmiş addımdır”.

Rahib İsgəndərli