DİM və Təhsil Nazirliyi yeni layihə həyata keçirəcək

“Biz artıq elə dövrdə yaşayırıq ki, bir ixtisası ömürlük seçmək olmaz”.

“Qərb Xəbər” “APA”ya istinadən xəbər verir ki, bunu “Yüksəliş” müsabiqəsinin final mərhələsi çərçivəsində təqdim olunan “Müasir çağırışlar və insan kapitalının formalası” mövzusunda təşkil edilən panel müzakirəsində Dövlət İmtahan Mərkəzinin Direktorlar Şurasının sədri Məleykə Abbaszadə deyib.

O bildirib ki, indiki dövrdə insanlar 5 dəfə öz seçdiyi sahəni dəyişməli olur:

“Texnologiyalar çox dəyişir. Ola bilsin ki, indi çox məşhur olan ixtisaslar 5 il sonra lazım olmayacaq. İxtisas seçimi yox, fəaliyyət istiqaməti təyin edilməlidir. İnsanlarla, kommunikasiyalarla, təbiətlə işləmək rahatdır?! Bu psixometrik testlərlə ölçülür. Öz-özünü kəşf etmək üçün testlər var. DİM tərəfindən çoxdan individual xidmətlər göstərilir, müraciət edənlərin sayı isə elə də çox deyil. Amma 15-16 yaşlı uşaqlarda bunu etmək üçün Təhsil Nazirliyi ilə layihə həyata keçirəcəyik və bu dövlət layihəsi olacaq. Biz təfəkkürü dəyişmək üçün bunu etməliyik”.