Gürcüstana Aİ üzvlüyünə namizəd statusunun verilməsi təxirə salınıb

Avropa Komissiyası Gürcüstana üzvlük statusunun verilməsi məsələsinə baxılmasını 2023-cü ilə qədər təxirə salıb. ‘Qərb Xəbər’  ‘24News.ge’yə istinadən xəbər verir ki, bu barədə Avropa Komissiyasının nümayəndəsi Mixail Rupp, Avropa Parlamentinin sessiyasında çıxışı zaman bildirib. Onun sözlərinə görə, Gürcüstan məsələsinə baxılması 2022-ci ilin sonunda deyil, 2023-cü ildə baş tutacaq: “Diqqətli müzakirələrdən sonra qərara gəldik ki, islahatlar üzərində dərindən işləmək üçün Gürcüstanın siyasi elitasını ümumi masa arxasına oturmağa tələsdirməyək. Beləliklə, Avropa Şurasının tələbi ilə genişlənmə paketində qeyd olunan prioritetlərin Gürcüstan tərəfindən necə yerinə yetirildiyi barədə hesabatı 2023-cü ildə hazırlayacağıq. Bu, Gürcüstanın siyasi sisteminə qeyd olunan prioritetlər üzərində dərindən işləmək üçün kifayət qədər vaxt verəcək”, – deyə Mixail Rupp bildirib. Qeyd edək ki, bundən əvvəl Gürcüstana üzvlük statusunun verilməsi məsələsinin 2022-ci ilin sonunda müzakirə olunacağı bildirilmişdi.