Qazaxda martın 11-də “Heydər Əliyev İli” çərçivəsində “Sağlam gələcəyimiz üçün ağac əkin!” devizi altında ağacəkmə aksiyası keçirilib.
“Qərb Xəbər” bildirir ki, Heydər Əliyevin anadan olmasının 100-cü ildönümünə həsr edilmiş ağacəkmə aksiyasında ADA Universitetinin rektoru Hafiz Paşayev, ADA Universitetinin prorektoru Fariz İsmayılzadə, Rayon İcra Hakimiyyəti başçısı , Azərbaycan Respublikası Sahibkarlar Təşkilatları Milli Konfederasiyasının prezidenti Məmməd Musayev, “Azərbaycan Sənaye Korporasiyası” Açıq Səhmdar Cəmiyyətinin baş direktoru Kamran Nəbizadə, Vətən müharibəsi iştirakçısı polkovnik Firdovsi Umudov və digər qonaqlar, ADA Universitetinin, Bakı Dövlət Universitetinin Qazax filialının, Qazax Dövlət Sosial-İqtisadi Kollecinin tələbələri, gənc könüllülər iştirak ediblər.
Qazax rayonunun Xanlıqlar kəndi ərazisində 4,5 ha torpaq sahəsində həyata keçirilən aksiya zamanı 1250 ədəd eldar şamı, 1250 ədəd sərv, 500 ədəd tuya, 500 ədəd çinar, 250 ədəd ərik, 250 ədəd badam olmaqla, 4000 ədəd ağac əkilib.
