Vətən müharibəsində Gəncədə dağıdılan ev yenidən inşa edilib

Gəncədə Vətən müharibəsi dövründə dağılmış evlərdə təmir-bərpa işləri davam etdirilir.

Report-un məlumatına görə, 44 günlük Vətən müharibəsi dövründə Ermənistan Silahlı Qüvvələri münaqişə zonasından və cəbhə xəttindən uzaqda yerləşən şəhər və rayonları artilleriya qurğularından və ballistik raketlər kompleksindən atəşə tutaraq dinc əhalini və mülki obyektləri hədəf alıb. Erməni silahlı dəstələrinin həyata keçirdiyi insanlığa və heç bir müharibə qaydalarına sığmayan terrorlar nəticəsində onlarla günahsız dinc sakin dünyasını dəyişib, yüzlərlə fərdi yaşayış evləri, sosial, iaşə və xidmət obyektlərinə ciddi ziyan dəyib.

Prezident İlham Əliyevin müvafiq sərəncamı ilə dəymiş ziyanın qiymətləndirilməsi və aradan qaldırılması məqsədilə yaradılan Dövlət Komissiyasının yekun qərarından sonra evlərin və obyektlərin bərpa-tikinti işlərinə başlanılıb. Ziyan dəyən tikililər bərpa edilərək sakinlərin ixtiyarına verilib. Yenidən inşa edilən evlərdən biri də, Gəncə şəhər sakini Elbir Cəfər oğlu Cəfərova məxsus evdir.

E.Cəfərov deyib ki, 2020-ci il Oktyabrın 17-də ermənilərin Gəncəyə atdığı raketlərdən biri yaşadığı küçəyə düşüb və özü xəsarət almasa da qonşularından 14 nəfər şəhid olub, bir neçə nəfər yaralanıb: “Küçədə raketin düşdüyü yerdə olan bir çox ev tamam dağılmışdı. Mənim və yaxınlıqdakı qonşularımızın evlərinin isə divarları çatlayıb, dam örtükləri dağılmışdı. Sağ olsun dövlətimiz, prezidentimizin sərəncamına uyğun olaraq adiəti qurumların əməkdaşları gəlib evimizə baxdılar, yaşamaq üçün təhlükəli olduğu üçün söküb tam yeni ev inşa etməyə başladılar. Kürsülü, 5 otaqlı evimin yerinə yenə 5 otaqlı ümumi sahəsi 192 kvadratmetr olan 2 mərtəbəli ev inşa edirlər. İnşallah ev tam hazır olduqdan sonra bizə təhvil verəcəklər və 5 nəfər ailə üzvümlə birgə yaşayacağıq”.

Gəncə şəhəri 44 günlük müharibə zamanı Ermənistan Silahlı Qüvvələrinin təcavüzündən ən çox ziyan çəkmiş ərazilərdəndir. Burada ümumilikdə 3800-dən çox yaşayış və qeyri-yaşayış obyekti dağıdılıb və ya qismən ziyan görüb. Dövlət başçısının tapşırığına əsasən hazırda 3200-ə yaxın tikili təmir-bərpa olunub, 12 yaşayış evi yenidən tikilib və hazırda onların təmir işləri aparılır. Bununla yanaşı 22 yaşayış evi tikilir, 1 bağçanın inşasına başlanılacaq. 500-dən çox tikili üzrə isə təmir-bərpa işləri davam edir. Gəncə şəhərində əhalinin rahat həyat şəraitinə qaytarılması üçün bütün zəruri qüvvələr cəlb olunub.

Qeyd edək ki, 11 şəhər və rayon ərazisində Ermənistan Silahlı Qüvvələrinin təcavüzü nəticəsində ziyan dəymiş tikililərin inşası və təmir-bərpa işləri Dövlət Şəhərsalma və Arxitektura Komitəsinin nəzarəti altında həyata keçirilir. Həmin ərazilərdə 13000-dən çox tikiliyə ziyan dəyib ki, hazırki mərhələdə onlardan 11750-dən çox yaşayış və qeyri-yaşayış obyekti üzrə tikinti və təmir-bərpa işləri artıq yekunlaşdırılıb. Digərlərində işlər planlaşdırılmış qrafik üzrə sürətlə aparılır və onların da yaxın zamanda tamamlanaraq mərhələli şəkildə təhvil verilməsi, sakinlərin rahat həyat şəraitinə qaytarılması üçün bütün zəruri qüvvələr cəlb edilib.