“Turkish Airlines” Moskvaya uçuşları dayandırır

“Turkish Airlines” aviaşirkəti Moskva hava limanlarında ötən gecə tətbiq edilən məhdudiyyətlər səbəbindən Rusiya paytaxtına uçuşları ləğv edir.

Qerbxeber.com TASS-a istinadən xəbər verir ki, bu barədə Rusiya Tur Operatorları Assosiasiyası (ATOR) məlumat yayıb.

“Rusiyanın mərkəzi hava limanlarında mayın 26-da gecə saatlarında təyyarələrin qəbulu və yola salınmasına yenidən məhdudiyyətlər tətbiq edilib. Bu, Domodedovo, Vnukovo və Jukovski hava limanlarının cədvəlində dəyişikliklərə səbəb olub. Reyslərin 60 %-ə qədəri qrafik üzrə həyata keçirilmir və ya ləğv edilib. O cümlədən “Turkish Airlines”in uçuşlarının müntəzəmliyi də zərər çəkib”, – məlumatda bildirilib.

Qeyd edilib ki, tur operatorları vəziyyəti araşdırır və yeni uçuş vaxtı haqqında məlumat gözləməyi tövsiyə edirlər.

“Pegas Touristik” Tur operatorunun baş direktoru Anna Podqornaya bildirib ki, texniki səbəblərə görə bəzi hallarda “Turkish Airlines” gecikmə statusu əvəzinə uçuşun ləğv edildiyini göstərir.

Sankt-Peterburq hava limanında sərnişinlərə Moskvaya uçuş cədvəlinin dəyişdirilə biləcəyi barədə xəbərdarlıq edilib.