Siyasətçi: “Avropa Birliyi üzbəüz görüşü dəstəkləyir”

Azərbaycan Respublikasının Xarici İşlər naziri Ceyhun Bayramovun Gürcüstana səfəri başlayıb. Ceyhun Bayramov səfər çərçivəsində Tbilisidə Gürcüstanın Baş naziri İrakli Qaribaşvili, Xarici İşlər naziri İlia Darçiaşvili və Ermənistanın Xarici İşlər naziri Ararat Mirzoyanla görüşəcək.

Məsələ ilə bağlı “Qərb Xəbər” ə “ReAl” partiyasının icraçı katibi Natiq Cəfərli bildirib ki, Tbilisi görüşündə əsas müzakirə mövzusu sərhədlərin delimitasiyası və demarkasiyasısı olacaq: ” Üzbəüz görüşlərin baş tutması kifayət qədər pozitivdir. Hər zaman Rusiya vasitəsilə görüşlərin keçirilməsi Rusiyanın maraqlarını irəli sürməsi ilə müşahidə olunur. Bu görüşün Türkiyə və Ermənistan danışıqları ilə paralel olması da vacib məsələdir.  Bir digər məsələ isə kommunikasiyaların açılmasıdır. Türkiyə və Ermənistan arasında sərhədlərin artıq minalardan təmizlənməsi, yol xəttlərinin açılması, dəmiryol xəttlərinin təmiri prosesi başlayıb. Yəni, bütün bu məsələlər kompleks şəkildə müzakirə olunacaq. Sülh prosesinə mühüm tövhə verəcəyini gözləyirəm. Üzbəüz danışıqların aparılması hər bir halda prosesi sürətləndirən amildir”.

N. Cəfərli bu prossesin Avropa Birliyi tərəfindən dəstəkləndiyini də vurğulayıb: ” Yaxın günlərdə AB rəhbərliyinin Bakıya gəlməsi gözlənilir. Hətta, sülh danışıqları müsbət yekunlaşarsa, Avropadan maliyyə dəstəyinin gələcəyi də güman edilir. 4,6 milyard avroluq dəstək planlaşdırılır. Ümümiyyətlə, Avropa Birliyinin Cənubi Qafqaz ölkələrinə marağı həmişə olub. Hətta , Azərbaycana marağı daha böyükdür. Çünki, enerji məsələsində Azərbaycan daha öndədir”.

Siyasətçi əlavə edib ki, burada Rusiya amili də vacibdir: “Elə bir ümumi razılaşmalar olmalıdır ki, Rusiya tərəfindən də əngəllərlə qarşılanmasın. Burada əsas problem Rusiya tərəfindən hər hansı əngəllərin yaradılıb, yaradılmayacağı məsələsidir” .