Şəhid adını daşıyan məktəb nə vaxt təmir olunacaq?

Aşağı Öysüzlü Tovuzun ən qədim kəndlərindən biridir. Çox təəssüflə deyə bilərik ki, şəhid Araz Hüseynovun adını daşıyan tam orta məktəbdə tarixin qalıqları özünü lap açıq-aşkar şəkildə göstərir. Siniflərə daxil olduqda keçmişə geri dönüş edirsən sanki. İkinci sinif şagirdlərinin təhsil aldığı otağa baxaq: Xanlıqlar dövründən qalan bu tikili necə var, eynilə qalmaqdadır.

Tavanı, divarları hər an uçmaq təhlükəsində olan bu təhsil ocağında 337 şagird təhsil alır. Onların təlim-tərbiyəsi ilə 45 müəllim məşğul olur. Respublika səviyyəsində hər il yüksək balla ali məktəblərə qəbul məhz bu məktəbdəndir. İdman zalı, Akt zalı, bufet, hətta ayaqyolunun belə olmaması yaşadığımız XXI əsrə nə dərəcədə yaraşır?! Normal şəraitin olmaması müasir metodla dərsin keçirilməsini mümkünsüz edir.

Qızğın Tovuz döyüşlərində belə doğma kəndindən bir addım geri çəkilməyən Aşağı Öysüzlülülər indi övladlarının olduqca bərbad vəziyyətdə olan binada təhsil almasından narahatdırlar. Mövcud vəziyyət valideynləri uşaqlarını digər kənd məktəblərinə köçürməyə vadar edir.

Məktəbin üç korpusu var ki, bunlardan ikisinin tikilmə tarixi ta xanlıqlar, bəyliklər dövrünə gedib çıxır. Müəllim-valideyn heyəti aidiyyatı orqanları dəfələrlə təhlükəli vəziyyətlə əlaqədar xəbərdar etsə də, bu günədək hər hansı bir addım atılmayıb.

Sözügedən təhsil ocağında qəzalı vəziyyət hər gün daha da artır. İstismara yararsız olan binada şagirdlərin və müəllimlərin həyatı təhlükədədir. Təhsil millətin gələcəyidir. Ümid edək ki, səlahiyyətli orqanlar millətin gələcəyinə biganə qalmayacaq, verilən vədlər yubanmadan əmələ keçəcək. “Qərb Xəbər” olaraq binanın taleyini nəzərdə saxlayacağıq.

Qeyd edək ki, Vətən müharibəsində xüsusi şücaət sərgiləyən Aşağı Öysüzlü kəndi çoxsaylı şəhid verib. Unutmayaq! Gələcəyin əsgərlərinin yolu bu məktəbdən keçir…

Aymirə İsmayılqızı,

Röyal İslam, Qərb Xəbər