Bu il rusların kütləvi axını və pul köçürmələrinin kəskin artması Gürcüstan və Ermənistanın ümumi daxili məhsulunun əhəmiyyətli dərəcədə artmasına və bu ölkələrin valyutalarının möhkəmlənməsinə səbəb olub.
“Qərb Xəbər” “24News.ge”yə istinadən xəbər verir ki, bu barədə analitiklər Rusiyanın “Forbes” jurnalının “S&P Global Ratings” icmalında qeyd ediblər. Bildirilir ki, ilin birinci yarısında Gürcüstanda ümumi daxili məhsulun artımı 10,3%, Ermənistanda isə 13,1% təşkil edib ki, bu da 2022-ci ilin əvvəli üçün proqnozdan xeyli yüksəkdir. Qeyd olunur ki, fevral ayının sonundan Gürcüstan və Ermənistanın valyutaları davamlı olaraq möhkəmlənib, digər inkişaf etməkdə olan bazar valyutalarının əksəriyyəti isə qlobal maliyyə sərtləşməsi və əmtəə qiymətlərinin artması səbəbindən ucuzlaşıb. “S&P Global Ratings”in məlumatına görə, martın əvvəlindən gürcü larisi dollara nisbətdə 20%, erməni dramı isə 30% möhkəmlənərək, bu valyutaları inkişaf etməkdə olan ölkələrin məzənnə seqmentində liderlərə çevirib.
Rusiyanın sərhəd xidmətinin məlumatına görə, 2022-ci ilin ikinci rübündə ölkəni tərk edən rusların sayı 5 milyon, üçüncü rübündə isə bu rəqəm 9,7 milyon təşkil edib. Məlumata əsasən, təkcə iyul-sentyabr aylarında Gürcüstana 461 min Rusiya vətəndaşı səfər edib.