Sosial şəbəkələrdə Qazaxın tarixi-memarlıq abidələrindən biri sayılan “İsrafil Ağa” hamamının süküldüyü iddia olunur. Bir tərəf söküldüyünü, digər tərəf abidənin tarixi mahiyyətinin geri qaytarılması üçün təmir olunduğunu deyir.
“Göyəzən.az”-ın yazdığına görə, Azərbaycan Respublikasının Nazirlər Kabinetinin 25 fevral 2022-ci il tarixli 123s nömrəli Sərəncamına əsasən, Qazax Rayon İcra Hakimiyyəti Qazax şəhər Kommunal Müəssisələri Kombinatının balansında olan, Qazax şəhəri, Şəhidlər Xiyabanı küçəsində 500.0 kv.m torpaq sahəsində yerləşən, ümumi sahəsi 417.0 kv.m təşkil edən yerli əhəmiyyətli memarlıq abidəsi olan 1 №-li hamam binası (“İsrafil Ağanın hamamı”) Azərbaycan Respublikası Mədəniyyət Nazirliyinin balansına verilib.
“Qazaxda yerli əhəmiyyətli memarlıq abidəsi olan İsrafil Ağa hamamının tarixi bina kimi qorunması məqsədilə Mədəniyyət Nazirliyinin balansına verilməsi tarixi keçmişimizə, milli mədəniyyət abidələrinə verilən qiymətin bariz nümunəsidir. Bu addım tarixi keçmişimizi özündə əks etdirən bu memarlıq incisinin, tarixi abidənin gələcək nəsillərə çatdırılmasını təmin edəcək”.
Bu da deməyə əsas verir ki, ikinci tərəf haqlıdır: “İsrafil Ağa” hamamı tarixi mahiyyətinin geri qaytarılması üçün təmir olunur. İddialara görə hamamın ətrafında müxtəlif ictimai-iaşə obyektləri fəaliyyət göstərir, onların abidənin tarixiliyinə xələl gətirməməsi üçün tədbirlər görülür.