Qərb Xəbər onları təbrik etdi – Video

Qərb Xəbər onları təbrik etdi Bəzən zəif, bəzən isə hədsiz güclü, bəzən sevinir, bəzən kədərlənir, kədərlənəndə dünya qəmə bürünür sanki.. Qadın həyatın gözəlliyini şərtləndirən əsas varlıq və nəhayətində isə anadır. Fərq etməz, cəmiyyətdə hansı mövqeyi tutur, hansı həyata məhkum edilib. Brilliant palçıqda da parlayır, axı..

Hələ yenicə addımlamağa başlayan, yayımına böyük hədəflərlə başlayan “RadioQərb”in kiçik olan kollektivi bu gün 8 mart – Beynəlxalq qadınlar günündə məhz onları təbrik etməyi özünə borc bildi. Düşündük ki, Qazax Rayonlararası Psixiatriya Xəstəxanasındakı qadınlar daha çox diqqətə, sosial müdafiəyə ehtiyac duyur. O qadınlar ki, özlərini atılmış, yaxınlarından, doğmalarından təcrid olunmuş hiss edirlər. Normal həyatda yaşadığımız üçün gözlərinin içinə baxa bilmirsən, çünki o gözlərdə olan təəssüflük, acizlik, bəzən kin, qəzəbin dərinliyində boğulur insan. Kimisi anadangəlmə məhkum edilib, kimisi isə yaşadığı həyatın ağrı-acısından, travmasından qazanıb bu xəstəliyi… Axı onları da yaradan Allahdır, nəhayətində nəfəs alıb-verən insandır? Qadındır?! Bu gün onların günüdür, onların çöhrəsində yaranan təbəssüm kimə yaraşır, onlara yaraşdığı qədər?!

Sabahımız necə olacaq, hansı surprizlər gözləyir bizi, bilmirik.. Bacardıqca könülləri şad etmək yerinə düşər, maddi baxımdan olmasa belə, ən azından mənəvi cəhətdən yardım ötürək ehtiyacı olanlara…

Aymirə İsmayılqızı Röyal İslam RadioQərb