Politoloq: “ Komitə vergi xidməti ilə birləşməlidir”

Dövlət Gömrük Komitəsinin vəzifəli şəxslərinin qanunazidd əməllərinin qarşısı alınıb. 10 iyun 2022-ci il tarixində başlayan əməliyyat-istintaq tədbirləri nəticəsində, 2-si general olmaqla bir qrup vəzifəli şəxs həbs olunub. Onlara qarşı vəzifə cinayətləri ittihami irəli sürülüb. Bununla bağlı Dövlət Təhlükəsizliyi Xidmətində cinayət işi üzrə kompleks əməliyyat-istintaq tədbirləri başlayıb.

23 aprel 2018-ci ildən DGK-nın sədri vəzifəsini icra edən Səfər Mehdiyev vəzifəsindən azad edilib. Bununla bağlı, prezident sərəncam imzalayıb. DGK-nın sədr vəzifəsini kimin icra edəcəyi ilə bağlı rəsmi tərəfdən heç bir məlumat verilməyib. Lakin sosial mediada yayılan məlumata görə, yeni sədr Mətin Eynullayev olacaq.

Məsələ ilə bağlı “Qərb Xəbər”ə danışan politoloq Nazim Bəydəmirlinin sözlərinə görə, gömrük xidməti vətəndaşlara xidmət göstərməlidir: ”Uzun illərdir Azərbaycanın ictimai fikrində regionçuluq, yerli bazlıq, qohum bazlıq bir ənənə kimi formalaşıb. Bu ənənə gömrük xidmətinə də təsir edir. Hətta ictimai fikirdə Nehrəm Gömrük Komitəsi kimi də adlandırılır. Çox təəssüf edirəm ki, dövlət orqanının belə bir imici formalaşıb”.

Politoloq Gürcüstandan tutmuş ABŞ-a kimi gömrük xidmətləri maliyyə nazirliyinin tərkibində olduğunü qeyd edib: “Bildiyimiz kimi, vergi və gömrük xidmətləri vahid mərkəzdən idarə olunur. Təəssüf edirəm ki, illərdir gömrük orqanları sahibkarların gətirdikləri mallara əlavə bəyənnamə qiyməti tətbiq edərək, suni qiymət artımı yaradırlar. Bu da pandemiya dövründə bir daha sübut olundu. Gömrük orqanlarının xətti ilə toplanan vəsaitlərin 78 %-i vergilərdən ibarətdir. Əlavə dəyər vergisi idxaldan, yol vergisi, məhsul vergiləri və s. Adından məlum olduğu kimi bunlar vergidi. Məntiqlə bunlar vergi xidmətinə bağlı olmalıdır. Bir variant olaraq deyim ki, vergi xidməti ilə birgə İqtisadiyyat Nazirliyinin tərkibində ola bilərlər. Ancaq arzu olunandır ki, maliyyənin həm yığılması, həm xərclənməsi bir vahid mərkəzdən olsun”.

Vüqar Mehtizadə
Qərb Xəbər