Döyülərək öldürülən 7 yaşlı uşağın babası: “Uşağın içalatı yoxdur, qırılıb hər şeyi

“Dünənki videoya (sosial şəbəkələrdə yayılan görüntülər – red.) baxdım və təfərrüatları öyrəndim. Qızım uşağı idmana aparıb, orda görüb ki, halı pisləşir. Anası içəri daxil olub, məşqçi anasını qovub. Deyib ki, idmandır da, burada heç nə yoxdur. Çıxandan sonra görüb ki, uşağın halı yoxdur”.

“Qərb Xəbər” bildirir ki, bunu döyülərək öldürülən 7 yaşlı uşağın babası İctimai Televiziyaya açıqlamasında deyib.

O bildirib ki, uşaq məktəbdən evə gətirildikdən sonra vəziyyəti pisləşdiyi üçün xəstəxanaya aparılıb:

“Müəllim deyib ki, çox qaçıb, yorulub. Uşağı halsız vəziyyətdə evə gətiriblər. Bundan sonra xəstəxanaya aparıblar. Orada həkim deyib ki, bunun içalatı yoxdur, qırılıb hər şeyi, beyin hissəsi dağılıb, bu uşaq yoxdur. Eləcə uşaq xəstəxanada keçinib”.

Xatırladaq ki, hadisə H.Z.Tağıyev qəsəbəsində, 19 nömrəli məktəbin idman zalında baş verib. Avropa oyunlarının bürünc mükafatçısı, tanınmış samboçu Mehman Xəlilov məşq zamanı 7 yaşlı Fərid Bakarova qarşı təhlükəli fənd işlədib. Nəticədə azyaşlının boynu qırılıb. O, Uşaq Xəstəxanasına çatdırılsa da, orada vəfat edib.