Çörəyin qiyməti arta bilərmi? – İqtisadçı açıqladı

Məlumdur ki,Azərbaycan taxıl təlabatını tam ödəyə bilmir. Ölkənin taxıla olan təlabatının xeyli hissəsi xaricdən idxal olunur. Hazırda davam edən Rusiya-Ukrayna müharibəsi dünyada qlobal  ərzaq qıtlığına, taxıl və digər dənli bitkilərin qıtlığına və bahalaşmasına əsas verir. Ölkədə və dünyada  çörəyin qiymətinin qalxa bilərmi? , Azərbaycan özünün taxıla olan ehtiyacını ödəyə bilərmi?

Məsələni “Qərb Xəbər”ə dəyərləndirən iqtisadçı  Nazim Bəydəmirli bildirdi ki, Azərbaycanda uzun illərdir ərzaqlıq buğdanın istehsalı ilə bağlı problem yaşanır.

“Təəssüf ki, bir neçə il bundan qabaq texniki bitkilərin yəni pambığın əkini ilə bağlı kompaniya xarakterli addımlar atıldı. Bir çox buğda sahələri də pambıq üçün istifadə edilməyə başladı. Bu, rayon icra başçılarının ‘yuxarıların’ gözünə yaxşı görünmək istəmələrindən irəli gəlirdi. Eyni zamanda əkin sahələrini şişirdərək, təyin olunmuş subsidyalar mənimsənilirdi.

Həmçinin, biz son illərdə Rusiyadan asılı olmuşuq. Hər il ərzaq buğdasının 80 faizi, yəni, təxminən 1 milyon tondan çox buğda Rusiyadan idxal olunur. Rusiya-Ukrayna müharibəsi ilə bağlı rus pulunun qeyri-stabilliyinə görə Azərbaycanda rus məhsulları daha çox bahalanır. Ona görə də Rusiya ilə ticarət etmək daha da çətinləşir”.

İqtisadçı rayonlarda sahibkarların təsərrüfatı yerli icra orqanlarının əli ilə sıradan çıxarıldığını qeyd etdi.

“Mən hökumətə tövsiyə edərdim ki, Azərbaycanın potensiyalından maksimum istifadə etmək lazımdır. Eyni zamanda rəqabət mühitini təmin etmək lazımdır. Sahibkarlara daha yaxşı şərait yaratmaq daxili istehsala çox böyük təsir edəcəkdir. Sahibkarlıq dedikdə insanların gözünün qarşısına məmurlar gəlir. Bu proses davam etdikcə ölkədə ərzaq qıtığı ola bilər. Aclıq da qaçınılmaz olar”.

Nazim Bəydəmirlinin sözlərinə görə Azərbaycan taxılının una əlverişli olmaması iddiaları tamamilə antikompaniyanın nəticəsidir.

“Toxumçuluq da aşağı səviyyəyə endirilib. Kənt Təsərrüfatı Nazirliyinə bu işlərdən xəbəri olmayan şəxslər gətirilib. Təsərrüfat ilə əlaqəli heç bir bilikləri, savadları olmayan adamlar bu işlərə cəlb olunub. Rusiya taxıl məsələsində müxtəlif ölkələri özündən asılı vəziyyətə saldığı üçün taxıl satışını bir ticarət silahına çevirib. Bunu da bizə qarşı istifadə edir. Azərbaycanda hər cür məhsul yetişdirmək mümkündür”.

“Bütün bu mənfi proseslər belə davam edərsə, düşünürəm çörəyin qiymətində artım müşahidə edəcəyik” – deyə iqtisadçı əlavə edib.

Rahib İsgəndərli

Qərb Xəbər