Lokal xarakterli antiterror tədbirləri nəticəsində Azərbaycan çox böyük və tarixi uğura imza atdı. Ordumuz yüksək peşəkarlıq nümayiş etdirdi, mülki sakinlər atəş altında qalmadı, yalnız hərbi hədəflər dəqiq atəşlə məhv edildi. Prezidentimizin də xalqa müraciətində vurğuladığı kimi, bundan sonra dinc birgəyaşayış üçün fundamental hüquqların təmini, humanitar məsələlərin həlli və sosial layihələrin icrası mərhələsi başlayır.
Bu sözləri “Qərb Xəbər”ə İlham Əliyevin keçirilən lokal antiterror tədbirləri barədə xalqa müraciəti haqqında danışan politoloq İlyas Hüseynov deyib.
Politoloq Azərbaycanın qısa zamanda qarşısına qoyduğu bütün vəzifələrin öhdəsindən gələcəyini vurğulayıb:
“Ölkəmiz antiterror tədbirləri ilə özünün dövlət iradəsini ortaya qoydu və nəticə kimi hazırda sözügedən məsələlər Yevlaxda keçirilən görüşdə ən incə detallarına kimi müzakirə edilir. Bundan öncə Bakıda görüş təklif edildi, eyni zamanda erməni icması Ağdamda və Yevlaxda görüşü qəbul edib, sonra imtina etdilər. İmtinadan sonra isə onlar ölkəmizdə terror fəaliyyətinə davam etdilər, Azərbaycanın da antiterror tədbirlərindən başqa çıxış yolu qalmadı. Xankəndi və ətrafında dövlətimizin konstitusion quruluşu təmin olunduqdan, hərbsizləşdirmə bitdikdən sonra reinteqrasiya prosesi daha sürətlə gedəcək, beləliklə bölgənin çöhrəsi dəyişəcək. Bütün dünya və Ermənistanın arxasında duranlar da Azərbaycanın görəcəyi tədbirlər fonunda dövlət ciddiyyətini, beynəlxalq hüquqlara, insan hüquqlarına əsl hörmətin şahidi olacaqlar”.
