Vens: İran ABŞ-nin şərtlərini yerinə yetirsə, münasibətlər köklü şəkildə dəyişəcək
Vaşinqton administrasiyası, Tehran tərəfi Amerikanın şərtlərini yerinə yetirəcəyi təqdirdə, İran ilə münasibətləri köklü şəkildə dəyişməyə hazırdır. Eyni zamanda, son günlər Livanda atəşkəsin təmin olunması istiqamətində də mühüm irəliləyişlər qeydə alınır.
Qerbxeber.com xəbər verir ki, bu barədə ABŞ-nin vitse-prezidenti Cey Di Vens bəyanat verib.
ABŞ, İran və vasitəçi ölkələrin nümayəndələrinin iştirakı ilə İsveçrənin Bürgenştok qəsəbəsində keçirilən danışıqlar zamanı jurnalistlərin suallarını cavablandıran vitse-prezident Livan böhranı ilə bağlı müsbət dinamikanı xüsusi vurğulayıb:
“Son bir neçə gündə biz Livanda atəşkəs rejiminin qorunub saxlanılması istiqamətində böyük tərəqqinin şahidi olduq. Livanla bağlı proseslərin hazırkı gedişatından çox məmnunam. Qarşıda hələ əlavə işlər var, lakin biz bu fəaliyyəti davam etdirəcəyik”.
Münasibətlərin gələcək perspektivlərinə toxunan Cey Di Vens Ağ Ev rəhbərinin diplomatik kursunu diqqətə çatdırıb:
“Prezident Donald Tramp bizə yeni səhifə açmağı, İran xalqı ilə münasibətlərimizi dəyişməyi və onlara əl uzatmağı tapşırıb. Əgər İran rəhbərliyi regionda qeyri-sabitlik mənbəyi olmaqdan əl çəkməyə və uzunmüddətli perspektivdə nüvə silahı iddialarından imtina etməyə hazırdırsa, ABŞ bu ölkə ilə əlaqələrini fundamental şəkildə dəyişməyə tam hazırdır. Bizim hədəfimiz, şübhəsiz ki, budur”.
Vitse-prezident keçirilən məsləhətləşmələrə toxunaraq bildirib ki, hazırda əsas sual tərəflərin birlikdə nələrə nail ola biləcəyidir: “Biz yeni səhifə aça, Yaxın Şərqdəki münasibətləri daimi əsasda dəyişə bilərikmi, yoxsa köhnə metodlara qayıdacağıq? Biz köhnə üsullara qayıtmağa çalışmırıq, lakin təbii ki, hadisələrin bu cür inkişafı da tamamilə mümkündür”.
Cey Di Vens İsveçrədəki danışıqların bütün ixtilafları birdəfəlik həll etməyəcəyini, lakin tərəflərə ən vacib məsələləri aydınlaşdırmaq imkanı verəcəyini vurğulayıb:
“Bu gün texniki danışıqların başlanğıcı qoyuldu. Bu müzakirələr bütün fikir ayrılıqlarını dərhal aradan qaldırmayacaq. Lakin bu, tarixdə ilk dəfə bizə imkan verir ki, komandalar şəklində bir araya gələk, hər iki tərəf üçün nəyin daha böyük əhəmiyyət kəsb etdiyini anlayaq, bu məsələləri tənzimləyək və daha yaxşı gələcəyə doğru irəliləyək”.
